«Դատական կաշառքների սակագների հրապարակումն էլ միգուցե կաշառքի գովազդի նպատա՞կ է հետապնդում» Արսեն Բաբայան

«Հայաստանի դատական ատյաններում գործող կաշառքների սակագների հրապարակմամբ՝ Կարեն Անդրեասյանի, ով Մարդու իրավունքների պաշտպանն է ՀՀ-ում, նպատակներից մեկը՝ PR-ի կամ շոու կազմակերպելն է: Նա մամուլի առաջին էջերում է»,-այս մասին այսօր լրագրողների հետ հանդիպման ժամանակ ասել է Դատական դեպարտամենտի միջազգային հարաբերությունների և հասարակայնության հետ կապերի ծառայության պետ Արսեն Բաբայանը:

Հակակոռուպցիոն երևույթների վերաբերյալ սակագներ հրապարակելով և վերագրելով ոլորտի 120 ներկայացուցիչների, ստացվում է, որ նրանք ինչ-որ կերպ առնչվել են այդ երևույթների հետ:

«Իսկ դատական կաշառքների սակագների հրապարակումն էլ միգուցե կաշառքի գովազդի նպատա՞կ է հետապնդում»,-հարցրել է նա:

Երեկ Մարդու իրավունքների պաշտպան Կարեն Անդրեասյանը, զեկույց ունենալով արդար դատաքննության իրավունքի վերաբերյալ, ներկայացրել էր ՀՀ եռաստիճան դատական համակարգում գործող կաշառքի սակագները՝ հարցումներից ստացված տվյալների հիման վրա:

Զեկույցի համաձայն՝ Առաջին ատյանի դատարանում կաշառքի չափերը տատանվում էին 500-10.000 դոլարի սահմաններում, իսկ Վճռաբեկ դատարանում հասնում էր մինչև 50.000 դոլար:

«Ճիշտ կլիներ, որ ՄԻՊ-ն փաստերի մասին տեղեկացներ մեզ, այս փաստերով ուսումնասիրություններ կանեիք, կպայքարեինք բոլորով, կօգնեինք վերացնել դատական համակարգում առկա թերությունները»,- ասել է Արսեն Բաբայանը:

«Ցանկացած տեղեկատվություն հիմնավոր չէ, եթե դրա համար չեն ներկայացվում կոնկրետ փաստեր, եթե այն նպատակ չի հետապնդում բացահայտել մեղավորներին, առավել ևս հրապարակված սակագները հանրության մոտ անվստահություն ստեղծելուն միտված գործընթաց է: Ինչի՞ն պետք է հասնենք դրանով»,- ավելացրել է նա'հարցնելով, թե մարդու ո՞ր իրավունքներն է պաշտպանել Կարեն Անդրեասյանը՝ զեկույցի այդ բաժինը հրապարակելով:

Ի պատասխան այն հարցի, թե չի՞ համարում, որ ՄԻՊ-ի զեկույցը կարող էր ուղղորդված լինել՝ հաշվի առնելով վերջին շրջանում գրվող այն թեման, որ Վճռաբեկ դատարանի նախագահ Արման Մկրտումյանին շուտով փոխարինելու են, Արսեն Բաբայանը պատասխանել է, որ հինգ տարի է, ինչ Արման Մկրտումյանն աշխատում է, հինգ տարի է՝ մամուլը գրում է, որ նրան հանելու են:

Ի պատասխան այն հարցի, թե Արսեն Բաբայանը որպես Դատական դեպարտամենտի աշխատակից, կարո՞ղ է համակարգի համար իրեն վիրավորված զգալ և դիմել դատարան, վերջինս ասել է. «Անձը կարող է դատարան դիմել միայն իր խախտված իրավունքների համար, իսկ զեկույցով Արսեն Բաբայանի իրավունքի խախտում չի եղել»: