ԱՆ-ը սպառնում է դատի տալ Լյուդմիլա Սարգսյանին

«Առավոտ» օրաթերթում դեկտեմբերի 19-ին հրապարակված «Պետական պատվեր, թե համակարգված ատկատ» խորագրով հոդվածի կապակցությամբ ՀՀ առողջապահության նախարար Դերենիկ Դումանյանը նամակով դիմել է ՀՀ Ազգային ժողովի պատգամավոր Լյուդմիլա Սարգսյանին` հոդվածում տեղ գտած տեղեկությունների վերաբերյալ հիմնավորված փաստեր ներկայացնելու հարցով:

Առողջապահության նախարարությունը լիահույս է, որ հարգարժան պատգամավորը հերքում կտպագրի կամ կներկայացնի հիմնավոր փաստեր «կոռուպցիոն երևույթների» վերաբերյալ: Այլապես նախարարությունը ստիպված կլինի իր պատիվն ու բարի համբավը պաշտպանելու համար ապատեղեկատվություն տարածող պաշտոնատար անձին Հայաստանի Հանրապետության օրենսդրությամբ սահմանված կարգով պատասխանատվության ենթարկելու պահանջ ներկայացնել` օգտագործելով օրենսդրությամբ ամրագրված բոլոր եղանակները, այդ թվում' դատական:

Այս հարցում նախարարությունը փորձում է ցուցաբերել կառուցողական մոտեցում` ակնկալելով կառուցողական քննադատություն, այլ ոչ թե «ըստ ներքին շրջանառության ինֆորմացիայի» տարածում:

Հիշեցնենք, որ Լյուդմիլա Սարգսյանը թերթին տված իր հարցազրույցում ասել էր.

«Ըստ ներքին շրջանառության ինֆորմացիայի՝ ատկատների չափը տատանվում է 5-10%-ի սահմաններում։ Այսինքն՝ եթե ինչ-որ բուժհաստատության տրամադրվում է, օրինակ, 100 մլն դրամի պետական պատվեր, ապա մինչև նրա հետ պայմանագիր կնքելը՝ նախարարությունից նրան նախապես տեղյակ են պահում, որ 5-10 մլն դրամ նա պետք է բերի և կանխիկ վճարի համապատասխան սուբյեկտներին։ Իսկ եթե բուժհաստատությունը հրաժարվում է դրանից, ապա հիմնականում նրա հետ չեն կնքում պետական պատվերի պայմանագիր։ Որոշ բուժհաստատություններ իրենց մի քանի միլիարդը (3-4 մլրդ) ստանում են իրենց կապերի շնորհիվ, որոշ բուժհաստատություններ՝ ատկատների շնորհիվ, որոնք հիմնականում վճարվում են առողջապահության նախարարության բարձրաստիճան չինովնիկներին, իսկ որոշներն էլ (հիմնականում մարզային բուժհաստատությունները) ստանում են խղճուկ գումարներ»: