«Շնորհակալ կլինենք պարոն Բաղդասարյանին, եթե սահմանված կարգով ներկայացնի ապացույցներ». Արսեն Բաբայան

Այսօր սիրված դերասան Վարդան Պետրոսյանի շահերի պաշտպան Նիկոլայ Բաղդասարյանը, անդրադառնալով հայտնի ավտովթարի շուրջ ընթացող դատական գործընթացներին, այսպիսի հայտարարություն էր արել. «2013թ-ի դեկտեմբերի 30-ի դատավորի որոշումը ստանալուց հետո ակնհայտ դարձավ, որ մինչև դատական նիստը դատավորն ու քննիչը անձամբ կամ միջնորդավորված ձևով հանդիպել են, և քննիչը փոխանցել է իր միջնորդությունը դատավորին: Վերջինս էլ այն «քոփի փաստ» է արել ու ներկայացրել որոշման տեսքով: Սա ակնհայտ է դառնում, եթե քննիչի միջնորդությունն ու դատավորի որոշումը մի փոքր համադրում ես: Ամբողջովին նույն սխալները, նույն վրիպակները: Օրինակ՝ մի նախադասության կոնկրետ բառերի արանքում երկու դեպքում էլ երեք բացատ է թողնված: Դա ինչպես կարող է պատահականություն լինել»:

Նիկոլայ Բաղդասարյանը նաև ընդգծել է, որ դրանք իրարից չեն տարբերվել անգամ բովանդակային առումով:

«Սա նշանակում է, որ մինչև դատական նիստը կանխորոշել էին ելքը: Սա անօրինական գործողություն է, և մենք դիմելու ենք, որ կարգապահական պատասխանատվության ենթարկվի դատավորը: Իմ կարծիքով, եթե մենք մի փոքր իրավական պետությունում ապրեինք, աշխատանքից էլ պետք է ազատեին նրան»,- ասել է նա։

Փաստաբանի հայտարարության շուրջ զրուցեցինք ՀՀ դատական դեպարտամենտի միջազգային համագործակցության և հասարակայնության հետ կապերի ծառայության պետ Արսեն Բաբայանի հետ, ով Lurer.com-ին ասաց հետևյալը.

«Ընդհանրապես փաստաբաններն իրենք են ընտրում մեղադրյալի պաշտպանության մարտավարությունը: Պրակտիկան ցույց է տվել, որ կան փաստաբաններ, որոնք պաշտպանության մարտավարությունն ընտրում են` գործերին հանրային հնչեղություն տալով, այլ փաստաբաններ՝ միայն օրենքով նախատեսված հիմքերով: Կան նաև փաստաբաններ, որոնք այս երկու միջոցներից օգտվում են միաժամանակ: Հայտնի է, որ ի տարբերություն դատարանների, փաստաբանները կարող են կատարել ցանկացած այնպիսի գործողություններ, որոնք արգելված չեն օրենքով, իսկ դատարանները`միայն այնպիսի գործողություններ, որոնք նախատեսված են Սահմանադրությամբ կամ օրենքներով: Ինչ վերաբերում է պարոն Բաղդասարյանի հայտնած կարծիքին, ապա բոլորն ազատ են իրենց կարծիքը հայտնել, սակայն, իրավունքի առումով, սոսկ կարծիքները բավարար չեն պետական մարմինների կողմից օրենքով նախատեսված գործառություներ իրականացնելու համար: Ինչպես նկատելի է պարոն Բաղդասարյանի հայտարարությունից, ինքը կարծում է, որ դատավորի կողմից թույլ է տրվել էթիկայի կանոնների խախտում: Փաստաբան Բաղդասարյանը գերազանց գիտի, թե ինչ քայլեր է անհրաժեշտ կատարել նման դեպքերում: Առնվազն պետք է ՀՀ դատարանների նախագահների խորհրդի էթիկայի հանձնաժողովին ներկայացնել իր կարծիքը հիմնավորող որևէ հիմնավոր փաստ, այլապես անհնար է դառնում ստուգել փաստաբանի կարծիքի համապատասխանությունն իրականությանը և դրա հետևանքի կիրառումը: Դատական իշխանությունը բազմիցս է հայտարարել, որ շնորհակալ կլինի բոլոր այն անձանցից կամ կազմակերպություններից, որոնք օրենքով սահմանված կարգով կներկայացնեն խախտման յուրաքանչյուր դեպք բացահայտող փաստարկված տեղեկություններ: Շնորհակալ կլինենք պարոն Բաղդասարյանին, եթե սահմանված կարգով ներկայացնի ապացույցներ»: