Երկու անգամ օդ կրակելը դատարանը համարել է իրավիճակին համարժեք հուզական դրսևորում և արդարացրել երիտասարդին

Մասիս քաղաքի բնակիչ Վոլոդյա Դալլաքյանն Արարատի և Վայոց Ձորի մարզերի ընդհանուր իրավասության առաջին ատյանի դատարանի դատավճռով ՀՀ քրեական օրենսգրքի 258-րդ հոդվածի 2-րդ մասով (Հասարակական կարգը կոպիտ կերպով խախտելը, որը զուգորդվել է բացառիկ ցինիզմով) մեղսագրված հանցանքի կատարման մեջ ճանաչվել է անմեղ, արդարացվել և ազատվել կալանքից' հանցակազմի բացակայության պատճառաբանությամբ:

Վոլոդյա Դալլաքյանին մեղադրանք էր առաջադրվել այն բանի համար, որ նա, 2012թ-ի օգոստոսի 13-ին ժամը 23:00-ի սահմաններում, տեղեկացել է իր տան դիմաց կայանած Մասիսի ջրային տնտեսությանը պատկանող ՎԱԶ-2121 ավտոմեքենայի անվադողը Համբարձում Հովհաննիսյանի կողմից դանակով ծակելու մասին, եղբոր' Արսեն Դալլաքյանի հետ իր «Կրայսլեր» մակնիշի ավտոմեքենայով ժամանել է դեպքի վայր: Արսեն Դալլաքյանը փորձել է մոտենալ Հովհաննիսյանին և պարզել կատարվածի պատճառը, իսկ Վոլոդյա Դալլաքյանը, իբր, խուլիգանական մղումներից ելնելով' հանել է նախապես լիցքավորած որոսորդական հրացանը և դիտավորությամբ, կոպիտ կերպով խախտելով հասարակական կարգը, երկու անգամ կրակել է Հովհաննիսյանի ՎԱԶ -2107 մակնիշի ավտոմեքենայի ուղղությամբ, որի մեջ եղել է նաև ընկերը' Սարգիս Մանուկյանը:

Մասիսի ոստիկանության բաժննում մեղադրանք էր առաջադրվել նաև նույն քաղաքի բնակիչ Համբարձում Հովհաննիսյանին: 2012թ-ի օգոստոսի սկզբներին Մասիս քաղաքում ՎԱԶ -2121 ավտոմեքենայի վարորդի կողմից ճանապարհն իրեն չզիջելուց հետո, Հովհաննիսյանը, խուլիգանական մղումներից ելնելով, իր առավելություններն արտահայտելու մոլուցքից դրդված, օգոստոսի 13-ին իր մոտ եղած դանակով ծակելով վնասել է այդ ավտոմեքենայի անվադողը: Այդ ժամանակ դեպքի վայր է ժամանել Վոլոդյա Դալլաքյանն, ով որսորդական հրացանով երկու անգամ կրակել է իր մեքենայի ուղղությամբ: Կրակելուց հետո Հովհաննիսյանը հեռացել է դեպքի վայրից, տնից վերցրել իր «Մակարով» տեսակի ատրճանակը և վերադառնալով'6 կրակոց արձակել ՎԱԶ-2121 մակնիշի ավտոմեքենայի վրա'խուլիգանությամբ Մասիս ՋՕԸ-ին պատճառել զգալի չափերով' 60 հազար ՀՀ դրամ նյութական վնաս:

Վոլոդյա Դալլաքյանն ու Համբարձում Հովհաննիսյանը մեղադրվել են ՀՀ քրեական օրենսգրքի 258-րդ հոդվածի 2-րդ մասով նախատեսված հանցագործության կատարման մեջ' կալանքի տակ գտնվելով ավելի քան 5 ամիս:

Դատաքննությամբ մեղադրանքն ամբողջությամբ հերքվել է.

Վոլոդյա Դալլաքյանը միջադեպին նախորդող պահին և նույնիսկ բուն միջադեպի ընթացքում, նպատակ չի ունեցել կոպիտ կերպով խախտել հասարակական կարգը և բացահայտ անհարգալից վերաբերմունք դրսևորել հանրության նկատմամբ: Պարզվել է նաև, որ նա հասարակական վայրում չի հայհոյել, չի վիճաբանել, ոչ մեկի նկատմամբ բռնություն չի գործադրել, բռնության գործադրման սպառնալիք չի տվել, որևէ գույք չի ոչնչացրել կամ վնասել: Դատարանը նշել է, որ ամբաստանյալի արարքում կան հասարակական կարգի խախտման տարրեր և արտաքուստ հասարակության նկատմամբ անհարգալից վերաբերմունք, ինչը պայմանավորում է Հովհաննիսյանի հակաօրինական վարքագծով' ծակող-կտրող գործիքով Դալլաքյանի քեռուն պատկանող և նրա տան մոտ կայանված ավտոմեքենայի անվադողը վնասելով:
Դալլաքյանի արարքում խուլիգությունը չի ապացուցվել.

Արարատի և Վայոց Ձորի մարզերի ընդհանուր իրավասության առաջին ատյանի դատարանը գտել է, որ Դալլաքյանի արարքում բացակայում է խուլիգանական դրդումը, իսկ հասարակական վայրում երկու անգամ օդ կրակելն ուղղված է ոչ թե դիտավորությամբ հասարակական կարգի կոպիտ կերպով խախտմանը, այլ արարքն սկսվել է Հովհաննիսյանի հակաօրինական վարքագծի հետևանքով, ինչը դատարանը համարում է ստեղծված իրավիճակին համարժեք հուզական դրսևորում. այն չի կատարվել հասարակության և բարոյականության նորմերի նկատմամբ անթաքույց արհամարհական հողի վրա, բացահայտ մարտահրավեր չէ՝ ուղղված հասարակական կարգի դեմ: Թեև Դալլաքյանի գործողությունները կատարվել են հասարակական վայրում, հասարակության ներկայությամբ, սակայն դրա հետևանքով վերջիններիս մոտ չի առաջացել զայրույթ կամ վրդովմունք և նրանց անհարմարություն կամ լուրջ անհանգստություն չի պատճառել:

Հաշվի առնելով նշված հանգամանքները և նաև վերլուծելով ու գնահատելով նախաքննությամբ ձեռք բերված և դատաքննությամբ հետազոտված յուրաքանչյուր ապացույց, դատաքննությամբ հետազոտված մյուս ապացույցների հետ համադրելով ամբաստանյալի նախաքննական և դատաքննական ցուցմունքները` Առաջին ատյանի դատարանաը գտել է, որ ամբաստանյալ Վոլոդյա Դալլաքյանի արարքում բացակայում են ոչ միայն խուլիգանության հիմնական հանցակազմի, այլև որակյալ հանցակազմի օբյեկտիվ և սուբյեկտիվ կողմը: Քրեական գործի փաստական տվյալներով հաստատված է նաև, որ ամբաստանյալը թեև դեմքով կանգնած է եղել դեպի այդ մեքենան, որը գտնվել է իրենից 170մ հեռավորության վրա, սակայն երկու կրակոցները կատարել է հրացանի փողը դեպի վերև ուղղած: Նա այդ պահին առջևից դեպի մեքենան գնացող եղբոր` Արսենի, համար վտանգ է զգացել, քանի որ Հովհաննիսյանի վարած մեքենան, լույսերը միացնելով, դանդաղ շարժվել է դեպի նրա կողմը:

Այսպիսով, ղեկավարվելով անմեղության կանխավարկածով, չփարատված կասկածները մեկնաբանելով հօգուտ ամբաստանյալի, հիմնվելով պատշաճ իրավական ընթացակարգի շրջանակներում դատաքննությամբ հետազոտված և փոխկապակցված հավաստի ապացույցների վրա, ինչպես նաև հաշվի առնելով վերոնշյալ փաստական և իրավական հիմնավորումները, դատարանը հետևություն է արել, որ Վոլոդյա Դալլաքյանի արարքում հանցակազմը բացակայում է:

Վոլոդյա Դալլաքյանն իրեն մեղավոր չի ճանաչում, սակայն ընդունում է կրակելու փաստը:

Ամբաստանյալ Վոլոդյա Դալլաքյանը դատաքննության ընթացքում ՀՀ քրեական օրենսգրքի 258-րդ հոդվածի 2-րդ մասով առաջադրված մեղադրանքում իրեն մեղավոր չի ճանաչել և խնդրել է հիմք ընդունել նախկինում իր տված ցուցմունքները: Նա միայն հայտնել է, որ թեև ընդունում է հրացանից երկու կրակոց կատարելու փաստը, սակայն չի ընդունում մեղադրանքը, քանի որ կրակոցները չի կատարել խուլիգանական դրդումներից ելնելով: Նախաքննության փուլում Դալլաքյանը մեղադրանքի և դեպքի հանգամանքների վերաբերյալ ցուցմունքներ է տվել, նշելով, որ 2012թ-ի օգոստոսի 13-ին, ժամը 22:30-ի սահմաններում եղբոր` Արսեն Դալլաքյանի հետ գտնվել է Արարատի մարզի Զորակ գյուղում գտնվող իրենց գազալցակայանում: Այդ ժամանակ իրեն է զանգահարել կինը` Անի Դալլաքյանը և հայտնել, որ ինչ-որ անձինք ուժեղ հարվածում են տան դարպասին և վնասել են դրսում կայանած «Նիվա» մակնիշի 296 ԼԼ 11 պետհամարանիշի ավտոմեքենայի անվադողը: Նույն պահին զանգահարել է իր հարևան Արամ Գրիգորյանը և հայտնել, որ անծանոթ անձինք ծակելու միջոցով վնասել են իրենց տան մոտ կայանված ավտոմեքենայի անվադողը:

Մտածելով, որ տան վրա հարձակում է կատարվել` գազալցակայանի աշխատասենյակից վերցրել է իր անվամբ գրանցված 16մմ տրամաչափի որսորդական հրացանը և անձնական օգտագործման «Կրայսլեր» մակնիշի ավտոմեքենայով եղբոր` Արսեն Դալլաքյանի հետ, վերադարձել են Մասիս: Իրենց տան մոտ, փողոցում տեսել է Արամ Գրիգորյանին, իսկ քիչ հեռու` ևս 2-3 մարդիկ են եղել, որոնց մթության պատճառով չի ճանաչել: Գրիգորյանը մատնացույց է արել 150-200 մետր հեռավորության վրա կայանված մի ավտոմեքենա և հայտնել, որ այդ ավտոմեքենայի մեջ է գտնվում ՎԱԶ-2121 մակնիշի մեքենայի անվադողը վնասած անձը: Լսելով այդ մասին` իր եղբայրը`Արսենը, քայլել է մեքենայի ուղղությամբ: Նույն պահին տեսել է, որ միացել են այդ մեքենայի լույսերը և մեքենան դանդաղ շարժվել է իրենց կողմը: Մտածելով, որ այդ անձինք նորից պատրաստվում են հարձակվել և ցանկանալով խուսափել վտանգից` պաշտպանվելու նպատակով իր ավտոմեքենայի բեռնախցիկից հանել է երկու փամփուշտով լիցքավորված իր երկփողանի հրացանը, որի փողը վեր բարձրացնելով' վախից երկու կրակոց է արձակել: Նա պնդել է, որ կրակելու նպատակն էր նաև վախեցնել նրանց: Իր կրակոցից հետո այդ ավտոմեքենան ուղղությունը թեքել է հակառակ կողմ ու հեռացել:Դրանից հետո եղբոր հետ մտել են տուն:

15-20 րոպե անց դրսից լսվել են կրակոցի ձայներ, որոնք դադարելուց հետո, երբ դուրս են եկել փողոց, ոչ ոքի չեն տեսել, սակայն վնասված են եղել ՎԱԶ-2121 մակնիշի ավտոմեքենայի ապակիները: Հետագայում պարզվել է, որ այդ մեքենայի անվադողը ծակել և մեքենայի վրա կրակել էր Համբարձում Հովհաննիսյանը, որին չի ճանաչել և ճանապարհը չզիջելու համար նրա հետ միջադեպ չի ունեցել: Թեև կրակոցները կատարելու պահին փողոցում եղել են մարդիկ և ժամն էլ եղել է գիշերային, սակայն իր կողմից որևէ հայհոյանք կամ գոռգոռոց չի եղել, ոչ մեկին, այդ թվում' մեքենային վնասելու, կամ մարդկանց անդորրն ու հասարակական կարգը խախտելու նպատակ չի ունեցել: