Գինու արտադրությունը Հայաստանում աճել է 12.3, կոնյակինը՝ 9.6 տոկոսով

Ալկոհոլային խմիչքների արտադրությունը Հայաստանում աճել է' բացի օղուց և լիկյորից: 2013 թվականին Հայաստանում գինու արտադրության ծավալը 2012 թ. համեմատ աճել է 12.3 տոկոսով և կազմել 6 միլիոն 422 հազար 300 լիտր, կոնյակինը՝ 9.6 տոկոսով և հասել 20 միլիոն 284 հազար 500 լիտրի: ՀՀ ազգային վիճակագրական ծառայության տվյալներով` անցյալ տարի, 2012 թ. համեմատ, գարեջրի արտադրության ծավալն աճել է 45.2 տոկոսով և կազմել 19 միլիոն 847 հազար 800 լիտր, իսկ շամպայնինը՝ 12 տոկոսով և հասել 536 հազար 400 լիտրի: 2013 թ., 2012-ի համեմատ, օղու արտադրության ծավալը մեր երկրում նվազել է 1.5 տոկոսով և դարձել 9 միլիոն 906 հազար 100 լիտր, իսկ լիկյորինը նվազել է 12.1 տոկոսով և կազմել 32 հազար լիտր: Էթիլային սպիրտի արտադրության ծավալն աճել է 51.1 տոկոսով և հասել 5 միլիոն 627 հազար 700 լիտրի:

2012 թվականին Հայաստանում արտադրվել է 18 միլիոն 514 հազար 100 լիտր կոնյակ, 5 միլիոն 718 հազար լիտր գինի, 10 միլիոն 61 հազար 800 լիտր օղի, 3 միլիոն 724 հազար 400 լիտր էթիլային սպիրտ, 13 միլիոն 668 հազար 200 լիտր գարեջուր և 478.8 հազար լիտր շամպայն: