ՀՀԿ-ն դեմ կքվեարկի ԱԺ-ում գազի հանձնաժողով ստեղծելու նախագծին

Ազգային ժողովի ՀՀԿ խմբակցությունը դեմ կքվեարկի գազի գնի ձևավորման ուսումնասիրության հանձնաժողով ստեղծելու նախագծին: Այս մասին այսօր Ազգային ժողովում հայտարարեց ԱԺ ՀՀԿ խմբակցության պատգամավոր Գագիկ Մինասյանը:

«Մենք դեմ ենք քվեարկելու այս նախագծին, քանի որ հանձնաժողովի ստեղծումը նպատակահարմար չէ: Բարձրացված հարցերը կարելի է պարզել այլ ճանապարհներով: Մեր ոչ իշխանական խմբակցություններին ես կոչ եմ անում չմոլորեցնել մեր հասարակությանը»,-նշեց Մինասյանը:

Մինասյանի կարծիքով, գազի գնի հետ կապված բոլոր հարցերը կարելի է քննարկել՝ կազմակերպելով խորհրդարանական լսումներ:

«Բոլորդ գիտեք, որ մեզ մոտ խորհրդարանական լսումները լիբերալ են, և շատ այլ երկրների նման միայն պատգամավորները չէ, որ կարող են ելույթ ունենալ, այլ մասնագետները, ովքեր կարող են պատասխանել բոլոր հուզող հարցերին»,-նշեց նա՝ կոչ անելով կազմակերպել խորհրդարանական լսումներ, հրավիրել մասնագետների և ուսումնասիրել բոլոր հուզող հարցերը: Մինասյանի խոսքով` բոլոր նրանք, ովքեր մտահոգված են գազի խնդիրներով, կարող են հարցեր ուղղել հանրային ծառայությունները կարգավորող հանձնաժողովի նախագահին, ով այսօր ելույթ է ունենալու Ազգային ժողովի ամբիոնից:

Գագիկ Մինասյանը նշեց, որ այս բոլոր տարիների ընթացքում պետությունը և կառավարությունը քայլեր են ձեռնարկել սպառողին և տնտեսվարողներին գազը մատչելի պայմաններով հասցնելու համար: «Դրա արդյունքը վերջերս կնքված հայ-ռուսական գազային համաձայնագիրն էր, որն ուղղված է մեր շարքային քաղաքացիների հանապազօրյա խնդիրների լուծմանը և մեր տնտեսության կայուն զարգացմանը»,-նշեց նա: