Մրցակցության պաշտպանության հանձնաժողովը մտադիր է տուգանքների գանձման առավել արդյունավետ մեթոդներ ներդնել

Տնտեսական մրցակցության պաշտպանության պետական հանձնաժողովի ինստիտուցիոնալ կարողությունները ուժեղացնելու նպատակով նախատեսվում է օրենսդրական փոփոխություններ իրականացնել: Օրենսդրական նախաձեռնության փաթեթն արդեն ուղարկվել է Ազգային ժողով: Այս մասին Ազգային ժողովում հայտարարեց ՏՄՊՊՀ նախագահ Արտակ Շաբոյանը՝ ներկայացնելով հանձնաժողովի 2014թ գործունեության ծրագիրը: «Օրենսդրական փոփոխությունները նպատակ ունեն բարելավել մի շարք խնդիրներ: Առաջինը՝ հանձնաժողովն ակնկալում է տուգանքների գանձման մեխանիզմների արդյունավետության բարձրացում: Մեր փորձը ցույց է տալիս, որ շատ ժամանակ տնտեսվարողները' իմանալով, որ իրենց դիրքերը թույլ են, ամեն դեպքում դիմում են դատարան, մենք մտնում ենք դատական պրոցեսների մեջ և դրա արդյունքում 3-4 տարի տևում է տվյալ գործը: Ահա սա է խնդիրը, որի համար մենք ցանկանում ենք տուգանքների գանձման ավելի արդյունավետ մեթոդներ ունենալ»,-նշեց Շաբոյանը:

Նրա խոսքով՝ օրենսդրական փոփոխություններով նախատեսվում է իրականացնել տուգանքների չափերի տարբերակում ըստ իրավախախտման ծանրության, ինչպես նաև տուգանքների կիրառման միասնական մոտեցումների ապահովում: «Մենք ուսումնասիրել ենք բոլոր դատական գործերը, վարչական բողոքները, վեր ենք հանել բոլոր խնդիրները և փորձելու ենք դրանք կարգավորել այս օրենսդրական նախաձեռնության միջոցով»,-նշեց նա:

Միջազգային փորձի հիման վրա հստակեցվել են մի շարք հասկացություններ, որոնք հիմնականում վերաբերվում են հակամրցակցային համաձայնությունների և գերիշխող դիրքի չարաշահումներին: Մեխանիզմներ են ընդգրկվել, որոնք թույլ չեն տա գործունեություն ծավալել մտավոր սեփականության միջոցով անբարեխիղճ մրցակցային գործունեություն իրականացնել ցանկացող տնտեսվարողներին:

Նախատեսվում է ներդնել նաև պատասխանատվության միջոցներից ազատման կամ պատասխանատվության միջոցի չափի վերաբերյալ մեխանիզմներ, այսինքն՝ այն տնտեսվարողներն, ովքեր մտել են հակամրցակցային համաձայնությունների մեջ, սակայն պատրաստ են համագործակցել ՏՄՊՊՀ-ի հետ և գիտակցում են, որ սխալվել են, հնարավորություն են ունենալու որոշակիորեն նվազեցնել պատասխանատվության միջոցների չափերը կամ ազատվել դրանցից: