Կապիտալի շուկայի զարգացումը կապված է կենսաթոշակային բարեփոխումների հետ. Արթուր Ջավադյան

Հայաստանի կենտրոնական բանկի նախագահ Արթուր Ջավադյանի խոսքով` Հայաստանը շարունակում է քաջալերել միջազգային ներդրողներին և թողարկողներին Հայաստանի ֆինանսական շուկա մտնելու և ներդրումային հնարավորություններն ընդլայնելու համար։ «Կապիտալի շուկայի հետագա զարգացումը կապված է կենսաթոշակային բարեփոխումների հետ։ Ազգային խնայողությունների դեռևս ցածր մակարդակը և դրանք արդյունավետ ներդրողներին ուղղելու սահմանափակ հնարավորություններն ակնհայտ են դարձնում, որ կենսաթոշակային բարեփոխումները ունեն ոչ միայն սոցիալական, այլ կարևոր տնտեսական նշանակություն։ Զարգացած կապիտալի շուկայի միջոցով կենսաթոշակային խնայողությունները կարող են ուղղվել տնտեսության տարբեր ոլորտներ և խթանել տնտեսական զարգացումը մեր երկրում։ Դրանք կստեղծեն կայուն պահանջարկ որակյալ և իրացվելի գործիքների նկատմամբ։ Ուստի պետք է կապիտալի շուկա ուղղորդել որակյալ թողարկողներ, որոնք կբերեն նոր ֆինանսական գործիքներ։ Կապիտալի շուկայի հետագա զարգացումը ներառում է նաև տեղական կորպորատիվ պարտատոմսերի շուկայի կայացումը, արտարժութային և տոկոսադրույքների շուկաների ստեղծումը՝ վերջնական թիրախ ունենալով նոր կապիտալ ներգրավելու նպատակով բաժնետոմսերի իրացվելի շուկայի ձևավորմանը»,- ասաց Ջավադյանը։

Ըստ նրա`մեր երկրի համար լավ պայմաններով թողարկվել է եվրապարտատոմսեր, որի արդյունքում մեր պետությունը հայտնվել է միջազգային ֆինանսական շուկաների քարտեզի վրա։

«Սա դրականորեն ազդեց մեր երկրի վարկանիշի վրա։ Վերջերս տեղի ունեցավ նաև միջազգային կազմակերպությունների թողարկած դրամային պարտատոմսերի առաջին տեղաբաշխումները։ Դրանք ստեղծում են որակյալ ներդրումային գործիքներ, բարենպաստ ներդրումային միջավայր, որոնք անհրաժեշտ են կենսաթոշակայի ֆոնդերի արդյունավետ կառավարման համար։ Մյուս կողմից դրանք ճանապարհ են հարթում ընկերությունների համար, որոնք կապիտալի շուկան կսկսեն դիտարկել որպես ներդրումների ներգրավման այլընտրանքային աղբյուր»,-ասաց Ջավադյանը։