Ֆինանսների նախարարը 2014 թվականին կայուն տնտեսական աճ է կանխատեսում

Հայաստանի և համաշխարհային տնտեսության համար 2013 թվականը լի էր անորոշություններով, սակայն մեզանում տարին ամփոփվեց 3,5 տոկոս տնտեսական աճով, որը մի կողմից ավելի ցածր է, քան 2012 թվականին արձանագրված 7,2 տոկոս աճը, իսկ մյուս կողմից' մեծ ձեռքբերում է՝ համեմատած հարևան պետությունների և համաշխարհային տնտեսության հետ։ Այս մասին Հայաստանի կապիտալի շուկայի զարգացումներին նվիրված կոնֆերանսի բացմանը նշեց ՀՀ ֆինանսների նախարար Դավիթ Սարգսյանը։

Նրա խոսքով` այն, ինչ տեղի է ունենում Հայաստանի հիմնական առևտրատնտեսական գործընկեր Ռուսաստանում, ինչպես նաև Եվրոպայում, փաստում է, որ համաշխարհային տնտեսությունը գտնվում է վատ վիճակում։ «Հայաստանի տնտեսության համար նախորդ տարի մեծ շոկ էր գազի գնի բարձրացման հետևանքով առաջացած բարձր գնաճը, որը հուլիսին գերազանցեց 9 տոկոսը։ Այնուամենայնիվ, դրամավարկային և հարկաբյուջետային կոորդինացված քաղաքականության արդյունքում տարին ավարտեցինք 5,6 տոկոս գնաճով, որը շատ քիչ էր տարբերվում մեր նախանշած գնաճի մակարդակից։ Սակայն կարող ենք փաստել, որ տարին ավարտել ենք՝ ապահովելով մակրոտնտեսական հավասարակշռություն և կայունություն»,-ասաց Սարգսյանը։

Նախարարն այս տարվա համար կայուն տնտեսական աճ է կանխատեսում՝ նշելով, որ 2014 թվական Հայաստանը մուտք է գործել շատ ավելի պատրաստված և ավելի մեծ ռեզերվներով։ «Մակրոտնտեսական կայունության մասին են վկայում երկու ցուցանիշ՝ միջին դեֆիցիտի ցուցանիշը և ընթացիկ վճարային հաշվեկշիռը։ Առաջինի դեպքում մենք, ծրագրած 2,5 տոկոսի փոխարեն, արձանագրել ենք 1,6 տոկոս ցուցանիշ։ Բյուջեի դեֆիցիտի նման ցուցանիշը հնարավոր է եղել ապահովել այն բանի հաշվին, որ հարկերի հավաքագրման և եկամուտների գեներացման գործընթացն ավելի դրական միտում է ունեցել, քան տնտեսական փաստացի աճը։ Մենք տարին ավարտում ենք ՀՆԱ-ում հարկերի 23,4 տոկոս ցուցանիշով, ինչը 1,3 տոկոսով բարձր է 2012-ից։ Իսկ ինչ վերաբերում է ընթացիկ վճարային հաշվեկշռին, ապա այն, նախնական տվյալներով, կկազմի ՀՆԱ-ի 8,5 տոկոսը»,-ասաց Սարգսյանը։

Ֆինանսների նախարարի լավատեսական կանխատեսումների համար հիմք են հանդիսանցել ճգնաժամից հետո արդյունաբերության և գյուղատնտեսության ոլորտում գրանցված լավ ցուցանիշները։ «2013 թվականը մենք ավարտում ենք արդյունաբերության ոլորտի 7,7 տոկոս աճով։ Անգամ առանց հանքահումքային արդյունաբերության՝ մեր մշակող արդյունաբերությունն աճել է։ Գյուղատնտեսությունը ևս աճել է 7,5 տոկոսով։ Սրան զուգահեռ մենք ունենք արտահանման 7,2 տոկոս աճ, որը արտահանմանն ուղղված արդյունաբերական քաղաքականության իրականացման արդյունք է»,-ասաց նախարարը։