Կենսաթոշակային բարեփոխումների ծրագրով վերապատրաստվել է 8 մասնագետ և 400 սոցիալական աշխատող

Տնտեսություն 8 Փետրվար, 2014 1:12

ԱՄՆ միջազգային զարգացման գործակալության ֆինանսավորմամբ` գործող «Կենսաթոշակային բարեփոխումների իրականացման ծրագրի» կողմից վերապատրաստում անցած 8 հատուկ դասընթացավարները ստացել են վկայագրեր։ Ինչպես տեղեկացնում են Կենսաթոշակային համակարգի իրազեկման կենտրոնից, ծրագրի առաջին փուլը սոցիալական ծառայությունների աշխատակիցների համար կենսաթոշակային օրենսդրության վերաբերյալ բոլոր մարզերում իրականացված համընդհանուր վերապատրաստման դասընթացների շարքն էր, իսկ երկրորդը՝ կենսաթոշակային բազմաստիճան համակարգի վերաբերյալ հանրային իրազեկման սեմինարների համար հատուկ դասընթացավարների վերապատրաստումը։

Դասընթացից առաջ իրականացված նախաթեսթավորման արդյունքները բացահայտել էին, որ անհրաժշետություն կա նոր կենսաթոշակային կուտակային համակարգը սոցիալական ծառայությունների աշխատակիցներին մանրամասն ներկայացնելու, քանի որ օրենսդրական փաթեթը ծավալուն է, իսկ համակարգը բավականին բարդ` ինքնուրույն ուսումնասիրելու համար: «Կենսաթոշակային համակարգի իրազեկման կենտրոն» (ԿՀԻԿ) հիմնադրամը, որը կազմակերպում է լայնածավալ իրազեկում, մեծ ծավալի դասընթացների իրականացման համար չունի սեփական ռեսուրսներ, և ԿՀԻԿ հիմնադրամի կարիքների գնահատման արդյունքում նախաձեռնվեց նոր դասընթացավարների վերապատրաստման ծրագիրը ։

«Կենսաթոշակային բարեփոխումների իրականացման ծրագիրը» իրականացրել է նաև գրեթե 400 սոցիալական աշխատողների վերապատրաստում, ինչպես նաև առանձին կազմակերպել հատուկ դասընթացավար մասնագետների վերապատրաստում։ Այսպիսով, կենսաթոշակային օրենսդրության թեմայով սեմինարների դասընթացավարի վկայագիր է ստացել 8 մասնագետ, ովքեր վերապատրաստման մանրամասն ուսուցում են անցել ԿԲԻԾ գրասենյակում, ՀՀ Կենտրոնական բանկում, Կենտրոնական դեպոզիտարիայում, ՀՀ Սոցիալական ապահովության պետական ծառայությունում, ՀՀ Պետական եկամուտների կոմիտեում։ Բացի այդ , 114 Թեժ գծի աշխատանքը առավել ճիշտ կազմակերպելու և ծառայության որակը բարձրացնելու նպատակով, դասընթացավարների հետ համատեղ վերապատրաստվել են նաև թեժ գծի 4 աշխատակիցներ։ Վերապատրաստման արդյունավետությունը գնահատվել է դասընթացներին հաջորդած թեսթավորմամբ, որի արդյունքներով՝ ուսուցման մասնակիցների գիտելիքները և կեսնաթոշակային օրենսդրության կիրառման հմտությունները զգալիորեն ավելացել են ։

Կենսաթոշակային օրենսդրության վերաբերյալ մասնագիտական կարողությունների զարգացման եռամսյա երկփուլ ծրագիրն իրականացվել է ԱՄՆ միջազգային զարգացման գործակալության ֆինանսավորմամբ գործող «Կենսաթոշակային բարեփոխումների իրականացման ծրագրի»(ԿԲԻԾ) և ՀՀ Աշխատանքի և սոցիալական հարցերի նախարարության(ՀՀ ԱՍՀՆ) միջոցով։ Դրա նպատակն էր աջակցել երկրում նոր կենսաթոշակային համակարգի օրենսդրության արդյունավետ իրականացմանը և շահառուների սպասարկումը՝ տարածքային սոցիալական ծառայություններում։