Համաշխարհային շուկայում էժանացող ոսկու հոսքը Հայաստան մեծացել է

Հայաստանից արտահանվող և ՀՀ ներկրվող ոսկու ծավալն անցյալ տարի 2012 թվականի համեմատ աճել է, համապատասխանաբար, 17.92 և 173.8 տոկոսով, իսկ համաշխարհային շուկայում ազնիվ մետաղի գինը նախորդ տարվա ընթացքում նվազել է շուրջ 27 տոկոսով: Ստացվում է, որ միջազգային շուկայում էժանացող ոսկու Հայաստան ներկրման ցուցանիշի աճը 10 անգամ գերազանցել է արտահանման աճի ցուցանիշը: ՀՀ կառավարությանն առընթեր պետական եկամուտների կոմիտեի տվյալներով՝ նախորդ տարի մեր երկիր է ներմուծվել 3 հազար 773 կիլոգրամ ոսկի, արտահանվել' 2 հազար 747.4 կգ: Անցյալ տարի մեր երկիր բերված ոսկու ծավալի հիմնական մասը Շվեյցարիայից (3050.5 կգ) և Ավստրիայից (642.1 կգ) է, իսկ արտահանվածը գրեթե ամբողջությամբ գնել է Կանադան: Այլ խոսքով` անցյալ տարի մեր երկրում ոսկու արտահանման/ ներմուծման տարբերությունը կազմել է շուրջ մեկ տոննա, հօգուտ ներմուծման: Մեր երկրից արտահանված ոսկու մաքսային ընդհանուր արժեքն անցյալ տարի գերազանցել է 73.5 միլիոն դոլարը, իսկ ներկրվածինը՝ 168.6 միլիոնը:

Միաժամանակ, նախորդ տարի մեր երկրից արտահանվել են 638.2 կիլոգրամ ոսկերչական իրեր, ինչը մոտ 64 տոկոսով գերազանցել է 2012 թվականի ցուցանիշը: Ներմուծված ոսկերչական իրերի ծավալը նախորդ տարի մնացել է 2012թ. մակարդակին՝ կազմելով շուրջ 190 կիլոգրամ: Ոսկերչական իրերի առևտրային բալանսը, ի հակադրություն չմշակված ոսկու, հօգուտ արտահանման է: Թվային արտահայտմամբ, անցյալ տարի մեր երկրից շուրջ 450 կիլոգրամով ավելի ոսկերչական իրեր է արտահանվել, քան ներկրվել:

Հարկ է նշել, որ 2012 թվականին Հայաստան էր ներկրվել մոտ 1.4 տոննա ոսկի, արտահանվել՝ ավելի քան 2.3 տոննա, իսկ 2011 թվականին ներմուծվել էր շուրջ 1.5 տոննա, արտահանվել՝ ավելի քան 2.3 տոննա ոսկի, այսինքն, այդ երկու տարիներին արտահանման ցուցանիշը գերազանցում էր ներկրման տվյալները:

Համաշխարհային շուկայում ոսկու տրոյական ունցիայի (31.1 գրամ) գինը, 10 տարի շարունակ հիմնականում աճելով, 2002 թվականի 280 դոլար մակարդակից 2012 թ. հասավ 1770 դոլարի: 2012 թվականի վերջին ամիսներից ոսկու գինը սկսեց նվազել և ներկայումս տատանվում է մեկ տրոյական ունցիայի դիմաց 1250 դոլարի սահմաններում: