Հայաստան ժամկետանց ձու չի ներկրվել

Հայաստանի Հանրապետություն ժամկետանց ձու չի ներկրվում: Հնարավոր են պիտանիության ժամկետի հետ կապված այլ երկրների և Հայաստանի միջև կարգավորումների տարբերություններ: Այդ մասին փետրվարի 12-ին հրավիրած ասուլիսում տեղեկացրեց ՀՀ գյուղատնտեսության նախարարության Սննդամթերքի անվտանգության պետական ծառայության, սննդամթերքի արտադրության վերահսկողության բաժնի պետ Վահե Դանիելյանը: «Հայաստանի Հանրապետություն պիտանիության ժամկետը լրացած ոչ մի հատիկ ձու չի ներկրվել»,-նշեց Դանիելյանը՝ հավելելով, երկրի ներսում ձուն իրացվել է պիտանիության ժամկետի մեջ: Նա պարզաբանեց, որ Ուկրաինայում առկա տեխնիկական պահանջների համաձայն ձուն մակնշվում է 60 օր պիտանիության ժամկետով, իսկ Հայաստանում՝ 25 օր, և անհրաժեշտություն է առաջանում ձվի վրա նշել մեր երկրում առկա պահանջներին համապատասխան ժամկետ: «Այդ ձուն մտել է Հայաստանի Հանրապետություն դեռևս 25 օրը չլրացած, անգամ ժամկետի կեսը չանցած»,- հավաստիացրեց Դանիելյանը:

Նրա խոսքով` շուկայում հայտնաբերվել է խմբաքանակ, որի վրա կրկնապիտակներ դրված չեն եղել: «Պարտավորեցրել ենք այդ խմբաքանակը շուկայից հետ հավաքել և համապատասխան կրկնապիտակների առկայությամբ ներկայացնել վաճառքի կետեր»,- նշեց բաժնի պետը: Միաժամանակ, նա հիշեցրեց, որ վաճառողներն իրավունք չունեն իրացնել ոչ պատշաճ մակնշմամբ ձու:

Վահե Դանիելյանը տեղեկացրեց, որ այս տարվա հունվար-փետրվարին մեր երկիր է ներկրվել ավելի քան 1.6 միլիոն հատ ձու: Բաժնի պետը տեղեկացրեց, որ ներկայում ստուգումներն ընթացքի մեջ են, և արդյունքները հայտնի կդառնան փետրվարի 13-ին:

Փետրվարի 11-ին տեղեկություններ են տարածվել, որ շուկայում հայտնաբերվել է թերի մակնշված կամ ժամկետանց ձվի խմբաքանակ: Ձուն ներկրվել է Ուկրաինայից: