Արմեն Մովսիսյանը «Նաիրիտի» աշխատակիցներին խոստացել է. որ կստանան մեկ ամսվա աշխատավարձը

ՀՀ էներգետիկայի և բնական պաշարների նախարար Արմեն Մովսիսյանն ընդունել է «Նաիրիտ» քիմիական գործարանի աշխատակիցների խմբին' լսելու նրանց բողոքները: Նրանք առավոտից բողոքի ցույց են կազմակերպել ՀՀ կառավարության շենքի մոտ' պահանջելով վճարել իրենց աշխատավարձերի պարտքը: ՀՀ կառավարության աշխատակազմի քաղաքացիների ընդունելության և դիմումների քննարկման վարչության պետ Ալեքսանդր Ղազարյանը մոտեցավ ակցիայի մասնակիցներին ու նրանց տեղեկացրեց, որ նախարար Արմեն Մովսիսյանը պատրաստ է ընդունել 5 ներկայացուցչի ու պատասխանել նրանց հուզող հարցերին: Հանդիպումն անցել է դռնփակ, այնուհետև աշխատակիցները նախարարության մոտ հավաքված լրագրողներին տեղեկացրել են, որ նրանց խոստացել են փետրվարի 15-20-ը վճարել մեկ ամսվա աշխատավարձը: Նաիրիտցիների խոսքով' նաև նշվել է, որ Հայաստան կժամանի «Ռոսնեֆտ» ընկերության ներկայացուցիչը, և բանակցություններ կընթանան «Նաիրիտի» վերագործարկման շուրջ:

Ալեքսանդր Ղազարյանն իր հերթին` խոսելով ակցիայի մասնակիցների հետ, նշել է, որ երեք ամսից նրանք էլ բողոքներ չեն ունենա: Գործարանի աշխատակիցները հանդիպման արդյունքների մասին տեղեկացրել են կառավարության շենքի մոտ սպասող իրենց գործընկերներին, ովքեր, սակայն, դժգոհ են մնացել և որոշել են գնալ նախագահական նստավայրի մոտ:

«Նաիրիտը» հիմնվել է 1940 թվականին: Անցյալ դարի 80-ականներին գործարանն զբաղեցնում էր քլորոպրենային կաուչուկի համաշխարհային շուկայի 10-12 տոկոսը: 2008թ.-ի դեկտեմբերի 1-ին գործարանի աշխատանքը դադարեցվեց' ֆինանսական ճգնաժամի պատճառով: Մոտ 1500 աշխատողներ ազատվեցին աշխատանքից: Rhinoville «Ռայնովիլ Փրոփերթի Լիմիթեդ» միջազգային ընկերությունը 2006 թվականին գնել է «Նաիրիտ գործարան»-ի բաժնետոմսերի 90 տոկոսը «ՀայՌուսգազարդից»: Բաժնետոմսերի մնացած 10 տոկոսը պատկանում է ՀՀ էներգետիկայի և բնական պաշարների նախարարությանը:

«Նաիրիտում» որոշակի պարբերականությամբ իրականացվում են աշխատակիցների աշխատավարձերի գծով պարտքերի մարումներ՝ մեկ ասմվա գումարի չափով. վերջին վճարումը կատարվել է դեկտեմբերի 27-ին: Գործարանում շուրջ 1 տարվա աշխատավարձի պարտք է առկա: