Սուրճ սիրող հայերը շարունակում են թանկ վճարել ամենօրյա «ծիսակատարության» համար

Հայաստան ներկրվող սուրճի ծավալն անցյալ տարի 2012 թվականի համեմատ ավելացել է 8.9 տոկոսով և կազմել 11 հազար 565 տոննա: Միաժամանակ, ներկրված սուրճի մաքսային ընդհանուր արժեքը նվազել է 2 տոկոսով և դարձել 25.8 միլիոն դոլար (1 կգ-ն՝ շուրջ 900 դրամ): ՀՀ կառավարությանն առընթեր Պետական եկամուտների կոմիտեի տվյալներով՝ 2012 թվականին մեր երկիր է բերվել 10 հազար 619 տոննա սուրճ: Սուրճի ներկրման ծավալների աճի հետ մեկտեղ 8.3 տոկոսով նվազել է դրա արտահանումը Հայաստանից: Անցյալ տարի մեր երկրից արտահանվել է 1233.9 տոննա սուրճ՝ 2012 թ. 1346.1 տոննայի դիմաց: Այսինքն` սուրճի առևտրային հաշվեկշիռն (ներմուծման/արտահանման տարբերություն) անցյալ տարի կազմել է ավելի քան 10.3 հազար տոննա՝ 2012 թ. 9.2 հազար տոննայի դիմաց: Փաստորեն անցյալ տարի 1.1 հազար տոննա ավելի սուրճ է մնացել մեր երկրում: Նախորդ տարի ներկրված սուրճի ավելի քան 80 տոկոսն Ինդոնեզիայից է, իսկ արտահանվածը գնել են Ռուսաստանն ու Վրաստանը:

Այս ամենի հետ մեկտեղ, ՀՀ Ազգային վիճակագրական ծառայության «հետաքրքրաշարժ վիճակագրություն» բաժնում շարունակում է մեծ հետաքրքրություն հարուցել Հայաստանում սուրճի միջին մանրածախ գինը, որն անցյալ տարի կազմել է մոտ 3.5 հազար դրամ կամ դրա մաքսային միջին արժեքից ավելի քան 4 անգամ թանկ: Բացի այդ, ԱՎԾ վիճակագրությունը սուրճի ներմուծման ծավալների մեջ ներառում է նաև ֆիզիկական անձանց առևտրի տվյալները, որն անցյալ տարի կազմել է 844 տոննա, ինչը լրացուցիչ ավելացնող գործոն է սուրճի սպառման ոլորտում: Փաստորեն սրճասեր հայությունը շարունակում է բա վական թանկ վճարել իր ամենօրյա «ծիսակատարության» դիմաց:

Հակոբ Վարդանյան