Հայաստանի բանկերի զուտ շահույթը գերազանցել է 38 մլրդ դրամը

Հայաստանում գործող 22 առևտրային բանկերի զուտ շահույթը 2013 թվականին կազմել է 38 մլրդ 181 մլն 288 հազար դրամ։ Նույն ժամանակաշրջանում բանկային համակարգի համախառն եկամուտները կազմել են 514,1 մլրդ դրամ, համախառն ծախսերը՝ 464,8 մլրդ դրամ: Արդյունքում, շահույթը մինչև հարկումը կազմել է 49,3 մլրդ դրամ: Ինչպես տեղեկացնում են ՀՀ կենտրոնական բանկից, բանկերի եկամուտների կեսից ավելին` 254,9 մլրդ դրամը, կազմել են տոկոսային եկամուտները:

Առևտրային բանկերը նախորդ տարվա ընթացքում ևս շարունակել են հիմնականում սպասարկել սպառողական և հիփոթեքային վարկերը։ 2013 թվականի վերջին եռամսյակում սպառողական վարկերն ավելացել են 7,3 տոկոսով և կազմել ավելի քան 365 մլն դրամ, իսկ հիփոթեքային վարկերն ավելացել են 3,1 տոկոսով՝ կազմելով ավելի քան 143 մլն դրամ։ Նախորդ տարվա վերջին եռամսյակում էապես ավելացել է հեռահաղորդակցության ոլորտի վարկավորումը։ Սեպտեմբեր-դեկտեմբերին հեռահաղորդակցության ոլորտին տրված վարկավորումն ավելացել է 44,8 տոկոսով՝ կազմելով ավելի քան 17 մլն դրամ։

Հայաստանում ներկայումս գործում են 22 առևտրային բանկեր՝ 485 մասնաճյուղերով։ Դրանց ընդհանուր հաշվեկշռային կապիտալը կազմում է 456 մլրդ 32 մլն 521 հազար դրամ։