Հայաստանն աշխուժացրել է հնաոճ իրերի առևտուրը

Հայաստանի Հանրապետությունից արտահանված հնաոճ իրերի (100 ևավելի տարի առաջ ստեղծված) ծավալն անցյալ տարի 2012 թվականի համեմատ աճել է 63 տոկոսով և կազմել 422.6 կիլոգրամ: ՀՀ կառավարությանն առընթեր Պետական եկամուտների կոմիտեի տվյալներով, միաժամանակ, նախորդ տարի մեր երկիր ներկրված հնաոճ իրերի ծավալը 2012 թվականի համեմատ աճել է ավելի քան 122 տոկոսով և դարձել 2 հազար 57.3 կիլոգրամ: Ներկրված իրերի մաքսային ընդհանուր արժեքը կազմել է շուրջ 238 հազար դոլար, իսկ արտահանվածինը՝ ավելի քան 103 հազար դոլար:

Նախորդ տարի մեր երկիր բերված հնաոճ իրերի մեծ մասը Ֆրանսիայից (1232 կգ) և Իտալիայից (565.3 կգ) է: Իսկ Հայաստանից հնաոճ իրեր են գնել հիմնականում Ռուսաստանը (182 կգ), ԱՄՆ-ը (176.9 կգ), ինչպես նաև Վրաստանը, Ավստրալիան, Գերմանիան և այլ երկրներ:

2012 թվականին Հայաստանի Հանրապետություն են ներկրվել 924.4 կիլոգրամ հնաոճ իրեր, արտահանվել՝ 259.2 կգ: