Գյուղատնտեսության նախարարը բացառում է Հայաստան անորակ սննդի ներկրման հնարավորությունը

Հայաստանի Հանրապետություն անորակ սննդի ներկրման հնարավորությունը բացառվում է, քանի որ սահմանին գործում է սննդի որակը ստուգող կառույց: Այդ մասին փետրվարի 18-ին Արարատի մարզի Ղուկասավան գյուղի ջերմոցներից մեկում լրագրողների հետ զրույցում նշեց ՀՀ գյուղատնտեսության նախարար Սերգո Կարապետյանը:

Նա հիշեցրեց, որ այսօր Հայաստանը դեռ չի կարողանում ձմռան ամիսներին բանջարեղենով ապահովել բնակչությանը, ուստի այն ներկրում է: Բացի այդ, Հայաստանը Առևտրի համաշխարհային կազմակերպության անդամ է և չի կարող արգելել որևէ երկրից ներմուծումը: «Բայց դա չի նշանակում, որ անորակ հումքը կարող է ներմուծվել հանրապետություն: Մենք ունենք սննդի անվտանգության ծառայություն, որտեղ աշխատանքները շատ բարձր հիմքերի վրա են դրված, և անորակ սննդամթերքը սահմանից չի կարող ներս մտնել»,-«ասաց Կարապետյանը:

Հայաստանի Հանրապետության գյուղատնտեսության նախարարության Սննդամթերքի անվտանգության պետական ծառայությունն իրականացնում է սննդամթերքի անվտանգության և համապատասխանության գնահատման, անասնաբուժության և բուսասանիտարիայի բնագավառների պետական կարգավորումը, ՀՀ օրենսդրությամբ նախատեսված դեպքերում իրականացնում է վերահսկողական գործառույթներ և կիրառում պատասխանատվության միջոցներ՝ այդ բնագավառում հանդես գալով ՀՀ անունից: Ծառայության կայքն է www.snund.am-ը: