ՄԱԿ-ը 459 հազար դոլար կներդնի Հայաստանի սերմնաբուծության ոլորտում

Բարձրակարգ սերմերի արտադրության կազմակերպման և գենետիկ ռեսուրսների պահպանման համար ՄԱԿ պարենի և գյուղատնտեսության կազմակերպությունը Հայաստանում 459 հազար դոլար բյուջեով ծրագիր կիրականացնի։ Այդ նպատակաով Հայաստանում մեկնարկել է խորհրդաժողով, որտեղ ներառված են շուրջ 45 ներկայացուցիչներ գիտական կենտրոններից, տարբեր կազմակերպություններից, ինչպես նաև ֆերմերներ և այլ շահագրգիռ կողմեր։

Խորհրդաժողովի բացմանը Պարենի և գյուղատնտեսության կազմակերպության բուսաբուծության և բույսերի պաշտպանության հարցերով պատասխանատու Ավետիք Ներսիսյանը նշեց, որ սերմնարտադրությունն այսօր աշխարհում ռազմավարական ուղղություն է, առաջնային' գյուղատնտեսության ոլորտում։ «Պետությունները մեծ ջանքեր են գործադրում, որ գենետիկ ռեսուրսները հավաքագրվեն և պահպանվեն, ինչպես արվում է, օրինակ, Նորվեգիայում։ Մենք կարծես թե ստեղծել ենք գենետիկ ռեսուրսների բանկ, սակայն այն դեռևս համալրման կարիք ունի։ Երկարաժամկետ պահպանման համար այն պետակա ն հովանավորության կարիք ունի, իսկ կարճաժամկետ պահպանումն ենթադրում է նաև գիտական աշխատանք»,-ասաց Ներսիսյանը։ Նրա խոսքով՝ ծրագրի նպատակն է սերմաբուծության հիմքով զարգացնել բանջարաբուծությունը Հայաստանում։

Խորհրդաժողովին մասնակցում էր նաև Հայաստանում Պարենի և գյուղատնտեսության կազմակերպության ներկայացուցչի օգնական Գայանե Նասոյանը, ով կարևորեց Հայաստանում սերմնաբուծության զարգացումը։ Նա նշեց, որ Հայաստանն այդ հարցում կստանա ՄԱԿ պարենի և գյուղատնտեսության կազմակերպության աջակցությունը։

Մասնակիցները քննարկեցին հանրապետությունում բանջարային մշակաբույսերի սերմնաբուծության և սերմնարտադրության համակարգի առկա վիճակը՝ նշելով այն քայլերը, որոնք անհրաժեշտ է կատարել այդ ուղղությամբ։ «Առաջինը քաղաքականության մշակումն է, երկրորդ ուղղությունը միջազգային կոնվենցիաների տեղայնացումն է, երրորդ ուղղությունը՝ քիմիկատների վերահսկումն ու ժամկետանց քիմիկատների հարցի լուծումը, իսկ չորրորդ ուղղությունը հենց գենետիկ ռեսուրսների պահպանման հարցն է»,-ասաց Ներսիսյանը։

ՄԱԿ պարենի և գյուղատնտեսության կազմակերպությունը աջակցում է ՀՀ կառավարությանը՝ բանջարային մշակաբույսերի սերմնաբուծության և սերմնարտադրության համակարգերի զարգացման գործում։ Ծրագրի նպատակներից է աջակցել երկրի իստիտուցիոնալ կարողությունների հզորացմանը, նպաստել բանջարեղենի արտադրության կայուն զարգացմանը՝ հիմնված գենետիկ ռեսուրսների վրա։