Հայաստանից արտահանվել է 4 հազար տոննա կարտոֆիլ

Հայաստանի Հանրապետությունից ընթացիկ տարվա 1.5 ամիսներին արդեն արտահանվել է 4 հազար տոննա կարտոֆիլ: Կարտոֆիլ արտահանողներն այն գյուղացիներից գնում են 220 դրամից ոչ պակաս գնով: Այս մասին փետրվարի 20-ին, Արմավիրի մարզպետարանում կայացած խորհրդակցությանը տեղեկացրեց ՀՀ գյուղատնտեսության նախարար Սերգո Կարապետյանը: «Հանրապետությունն անցյալ տարի հնարավորություն ունեցավ շուրջ 25 հազար տոննա կարտոֆիլ արտահանել և այս օր, միայն այս մեկուկես ամսվա ընթացքում, հանրապետությունից արդեն արտահանվել է 4 հազար տոննա կարտոֆիլ: Ռուսաստանում, Իրանում, եվրոպական շատ երկրներում այս տարի կարտոֆիլի բերքը շատ վատ է, և կարտոֆիլի դեֆիցիտ կա»,- ասաց Կարապետյանը՝ հավելելով, որ Հայաստանից կարտոֆիլի արտահանումը շարունակվում է:

Նախարարի խոսքով՝ արտահանման ծավալների աճը նպաստել է, որպեսզի գյուղացին ավելի բարձր գնով մթերի իր ունեցած կարտոֆիլը և բարձրացնի եկամուտները: «Այս տարի կարտոֆիլի ցանքատարածություններն անպայման ավելանալու են»,- վստահեցրեց նախարարը:

Հայաստանում նախորդ տարի կարտոֆիլի բերքը կազմել է շուրջ 660 հազար տոննա՝ 2012 թվականի 647 հազար տոննայի դիմաց: Նախորդ տարի Հայաստանից արտահանվել է 23 հազար 503,8 տոննա կարտոֆիլ, ինչը մոտ 22 անգամ գերազանցել է 2012 և 2011 թվականների ցուցանիշը: