Մաքսային միության տարածքում կգործեն տնտեսական մրցակցության միասնական սկզբունքներ

Մաքսային միության շրջանակներում կձևավորվի միասնական մարմին, որը կապահովի միության անդամների տարածքում հակամրցակցային գործողությունների բացահայտումն ու կանխումը։ Այդ շուկաներում հակամրցակցային գործողությունների համար կսահմանվի տուգանք, որը կփոխանցվի այն երկրի բյուջե, որի տարածքում գրանցված է խախտում իրականացրած սյուբեկտը։ Այս մասին լրագրողների հետ հանդիպման ժամանակ տեղեկացրեց ՀՀ տնտեսական մրցակցության պաշտպանության պետական հանձնաժողովի նախագահի տեղակալ Պավել Ղալթախչանը՝ հավելելով, Հայաստանի և Մաքսային միության մրցակցային օրենքների անհամապատասխանություն չի եղել և օրենքներում լուրջ փոփոխությունների կարիք չկա։ «Հայաստանում մրցակցության մասին օրենքում կկատարվի միայն տերմինաբանական վեց փոփոխություն, որը կհստակեցնի այդ տերմինների նշանակությունը։ Մրցակցության մասին օրենքը և Մաքսային միության կանոնները համապատասխանում են եվրոպական չափանիշներին, և այստեղ որևէ խնդիր չկա»,-ասաց Ղալթախչյանը։

ՏՄՊՊՀ փոխնախագահը նշեց, որ միության անդամ պետությունների համար կգործի Մրցակցության միասնական սկզբունքների և կանոնների համաձայնագիրը։ «Համաձայնագրի նպատակը կողմերի միասնական մրցակցային քաղաքականության ձևավորումն է՝ ապահովելու ապրանքների, ծառայությունների և ազատ կապիտալի տեղաշարժը, Մաքսային միության մասնակից պետությունների միասնական մաքսային տարածքում ազատ տնտեսական գործունեությունը և ապրանքաշուկաների արդյունավետ գործունեությունը, այնպիսի գործողությունների արգելումը, որոնք կարող են բացասաբար անդրադառնալ կողմերի փոխադ արձ առևտրի վրա։ Համաձայնագրի շրջանակներում ՄՄ տարածքում մրցակցային խնդիրները լուծելու են ոչ թե պետություններն առանձին առանձին, այլ ՄՄ համապատասխան մարմինը»,-ասաց նա։

2013 թվականի սեպտեմբերի 3-ին ՀՀ նախագահ Սերժ Սարգսյանը Մոսկվայում հայտարարեց, որ Հայաստանը մտադիր է անդամակցել Մաքսային միությանը: Դեկտեմբերի 24-ին Մոսկվայում տեղի ունեցավ ՄՄ անդամ պետությունների ղեկավարների հանդիպումը, որի ժամանակ ստորագրվեց նաեւ Հայաստանի' Մաքսային միությանն անդամակցելու համար նախատեսված ճանապարհային քարտեզը, որի իրականացման միջոցառումների ծրագիրը հունվարին հաստատել է ՀՀ կառավարությունը: Մաքսային միության անդամներն են Ռուսաստանը, Ղազախստանն ու Բելառուսը: