Հայաստանը պատրաստ է ՄՄ-ի հետ ստորագրելու Հակադեմփինգային համաձայնագիրը

Հայաստանի և Մաքսային միության հակադեմփինգային օրենքներում, ինչպես նաև գործող պաշտպանական միջոցներում չկա հակասություն, և Հայաստանն արդեն պատրաստ է ՄՄ-ի հետ ստորագրելու Հակադեմփինգային համաձայնագիրը։ Այս մասին լրագրողների հետ հանդիպման ժամանակ նշեց ՀՀ էկոնոմիկայի նախարարի գլխավոր խորհրդական, Հակադեմփինգային քաղաքականության հարցերով աշխատանքային խմբի ղեկավար Արա Պետրոսյանը։ Նրա խոսքով՝ միության տարածքում կգործի միասնական կոմիտե, որն էլ կլուծի հակադեմփինգային հարցերը։ «Մաքսային միությանը Հայաստանի անդամակցության ճանապարհային քարտեզով նախատեսված միջոցառումներն արդեն ավարտին են մոտենում, և մենք պատրաստ ենք ստորագրելու համաձայնագիրը։ Մեր մասնագետներն ուսումնասիրել են ՄՄ օրենքներով գործող պաշտպանական միջոցները, և համոզված ենք, որ դրանք Հայաստանի վրա բացասական ազդեցություն ունենալ չեն կարող։ Օրենքում փոփոխությունների խնդիր և վերադասավորումների անհրաժեշտություն ևս չի լինի»,-ասաց Պետրոսյանը։ Նա տեղեկացրեց, որ հանդիպումներ են կազմակերպվել նաև մասնավոր հատվածի ներկայացուցիչների հետ, ովքեր ևս հավաստել են, որ որևէ խնդիր չկա՝ կապված այս համաձայնագրի ստորագրման հետ։

2013 թվականի սեպտեմբերի 3-ին ՀՀ նախագահ Սերժ Սարգսյանը Մոսկվայում հայտարարեց, որ Հայաստանը մտադիր է անդամակցել Մաքսային միությանը: Դեկտեմբերի 24-ին Մոսկվայում տեղի ունեցավ ՄՄ անդամ պետությունների ղեկավարների հանդիպումը, որի ժամանակ ստորագրվեց նաև Հայաստանի' Մաքսային միությանն անդամակցելու համար նախատեսված ճանապարհային քարտեզը, որի իրականացման միջոցառումների ծրագիրը հունվարին հաստատել է ՀՀ կառավարությունը: Մաքսային միության անդամներն են Ռուսաստանը, Ղազախստանն ու Բելառուսը: