Հայաստանում տավարի գլխաքանակն ավելացել է 10 հազար գլխով, ոչխարինը՝ 30 հազարով

Հայաստանում 2014 թվականին անասնագլխաքանակը հիմնականում կավելանա՝ պահպանելով նախորդ տարիների միտումները: Մսի գինը կպահպանվի ներկա մակարդակի վրա, տարվա ընթացքում հնարավոր է խոզի մսի 5-6 տոկոս գնաճ: Այդ մասին «Արմենպրես»-ի հետ զրույցում նշեց ՀՀ գյուղատնտեսության նախարարարության անասնաբուծության և անասնաբուժության վարչության պետ Աշոտ Հովհաննիսյանը: Նա հիշեցրեց, որ արդեն 2 տարի է հանրապետությունում անասնագլխաքանակի աճի հարցում միտումները դրական են: «2013 թվականին 2012-ի համեմատ խոշոր եղջերավորների գլխաքանակի աճը գերազանցեց 30 հազարը, որից 20 հազարը կովեր էին: Ոչխարների գլխաքանակն ավելացավ մոտ 80 հազար գլխով: Եվ գլխաքանակի աճի նման միտումները կպահպանվեն նաև այս տարի: Դեռ թվերն ամփոփված չեն, բայց նախնական տվյալներով, 2014 թվականի հունվարի 1-ի դրությամբ, նախորդ տարվա համեմատ տավարի գլխաքանակն ավելացել է ավելի քան 10 հազար գլխով, որից 3 հազարը կովեր են: Ոչխարների և այծերի գլխաքանակը նախորդ տարվա համեմատ ավելի կլինի ավելի քան 30 հազար գլխով»,-հայտնեց Հովհաննիսյանը՝ հավելելով, որ խոզերի գլխաքանակը կամ կպահպանվի նախորդ տարվա մակարդակին, կամ կնվազի 3-5 տոկոսով:

Խոսելով անասնագլխաքանակի աճի, մսի գնի նվազման կապի և գյուղացու հնարավոր վնասների մասին՝ մասնագետը նշեց, որ մսի գինը բավական մեծ տեսակարար կշռով չի նվազում՝ մոտավորապես 7-8 տոկոսի չափով: «Դա, իհարկե, գյուղացու համար լավ չէ, բայց բոլոր դեպքերում սպառողի, ժողովրդի համար լավ է: Համենայն դեպս, գները տատանվում են այն տիրույթում, որն առայժմ բավարարում է գյուղացուն և հնարավորություն է տալիս ունենալ որոշակի շահույթ»,-ասաց վարչության պետը և ավելացրեց, որ մսի գինը հիմնականում կպահպանվի ներկա մակարդակի վրա: «Գնանկում հնարավոր է լինի տարեվերջին, երբ հոկտեմբերին մորթի և իրացման մեծ ծավալներ կլինեն»,- ասաց Հովհաննիսյանը'հավելելով, որ հնարավոր է, խոզի մսի գինը 5-6 տոկոսով աճի, ինչը պայմանավորված է գլխաքանակի և ներմուծման ծավալների որոշակի նվազմամբ: «Սպառողները նախապատվություն են տալիս տեղական մսին, և քանի որ առաջարկը տեղական մսի նկատմամբ կբարձրանա, հնարավոր է, խոզի մսի որոշակի գնաճ լինի մայիսին»,-եզրափակեց Հովհաննիսյանը:

2013 թվականի հունվարի 1-ի տվյալներով` հանրապետությունում հաշվառվել է 303 հազար 277 կով, 145 հազար 44 խոզ, 645 հազար 711 ոչխար և 29 հազար 20 այծ: 2012 թվականին 2011-ի համեմատ կովերի գլխաքանակն աճել է 7 տոկոսով, խոզերինը՝ 34,2 տոկոսով, ոչխարներինը՝ 15 և այծերինը' 1,5 տոկոսով:

Նախորդ տարի, 2012 թվականի համեմատ, Հայաստանում մսի արտադրության ծավալն աճել է 9.3 տոկոսով և գերազանցել 72 հազար տոննան: