ԱԺ-ն քննարկում է գազային հարցերով հանձնաժողով ստեղծելու հարցը

Ազգային ժողովի այսօրվա նիստում քննարկման դրվեց Գազային հարցերով ժամանակավոր հանձնաժողով ստեղծելու ՀՀԿ և ՕԵԿ առաջարկը:

Հիմնական զեկուցող, ՀՀԿ խմբակցության պատգամավոր Դավիթ Հարությունյանը նշեց, որ գազային հարցերի ուսումնասիրության խնդիրը հատկապես արդիական դարձավ դեկտեմբերի 2-ին ստորագրված պայմանագրերից հետո, երբ բազմաթիվ հարցեր ծագեցին:

«Խորհրդարանական ոչ իշխանական չորս ուժերը ժամանակավոր հանձնաժողով ստեղծելու առաջարկով հանդես եկան, բարձրացրին երկու հարց, որ իսկապես կարևոր էին, սակայն խորհրդարանական մեծամասնություևը մերժեց դա»,-ասաց Դավիթ Հարությունյանը` պարզաբանելով, թե ինչով էր պայմանավորված դա:

«Ոչ նրանով, որ այդ հարցերը արդիական չեն: Ամենևին, խոսքը վերաբերում է իսկապես շատ կարևոր հարցերի, որոնց պատասխանները պետք է տրվեն, և շատ ճիշտ է, որ դրանց պետք է անդրադարձ կատարվի խորհրդարանի մակարդակով, բայց գաղտնիք չէ, որ այդ հարցերը ունենում են նաև քաղաքական ենթատեքստ, ու անհրաժեշտ է, որ լինի հավասարակշռված մոտեցում, որ քննարկվի հարցը իբրև խնդիր՝ գոյություն ունեցող խնդիր, ոչ թե քաղաքական շահարկումների առարկա: Համաձայնելով բովանդակային խնդիրների հետ՝ մենք մերժել ենք մոտեցման ձևերը և առաջարկում ենք ավելի հավասարակշռված, պատասխանատու մոտեցում, բացի այդ, կարծում ենք՝ այն հարցերը, որ ներկայացվել էին, ծայրահեղ նեղ էին, պետք էր անդրադառնալ շատ ավելի լայն հարցերի շրջանակի, որ նույնպես հանդիսանում են այսօր լայնորեն քննարկվող հարցեր»,- ասաց նա:

Հարությունյանի խոսքով՝ հանձնաժողովում քննարկվելիք հարցերի մեջ ընդգրկված է սպառողների շահերի պաշտպանության ներկայիս վիճակը, նա տեղեկացրեց նաև, որ հարցերն ընդգրկում են բազմաթիվ ենթահարցեր, որոնց թվարկումն անգամ անհնար է, ուստի նշել են մի քանի հարցով:

Հանձնաժողովի ուսումնասիրման առարկա կդառնա բնական գազի ջերմատվությունը, հաշվիչների ստուգաչափման գործընթացը, կորուստների հիմնավորվածությունը:

Հարությունյանի խոսքով՝ բազմաթիվ հարցերը, որ վերաբերում են սպառողների իրավունքների պաշտպանությանը, կարող են ընդգրկվել օրակարգում, հաջորդ կարևոր հարցը գազի դիմաց կուտակված պարտքն է, որի դեպքում, ըստ պատգամավորի, եթե համադրեն ձևակերպումները՝ ներկա և նախկինը, կտեսնեն, որ այս ձևակերպումը շատ ավելի կոռեկտ է, այն կոռեկտ դարձավ քննարկումների արդյունքում, այդ թվում նաև հաև ընդդիմադիր գործընկերների հետ:

«Հանձնաժողովի նպատակը ոչ թե զուտ պարտքի հիմնավորվածությունը ստուգելն է, այլ շատ ավելի լուրջ է՝ պարտքի ձևավորման օրինականության հարց, ինչպես նաև չափի հիմնավորվածությունը: Քննարկման կդրվի նաև ՀայռուսԳազարդ ընկերության օտարված բաժնեմասի գնահատման գործընթացը, ընդհանրապես բնական գազի այլընտրանքային ներկրման հարցը՝ լինի դա ռուսական կամ այլ երկրի արտադրության, ինչպիսին են կանխատեսումները, ինչ հնարավորություններ կան և ինչ սահմանափակումներ»,-ասաց նա:

Հարությունյանը նշեց, որ հանձնաժողովում ուսումնասիրման կդրվեն նաև ոչ թե միայն Հայաստան մատակարարվող գազի խնդիրը, այլ Հայաստանի հնարավորությունները՝ իբրև տարանցիկ երկիր օգտագործվելու՝ ինչպիսի իրավիճակում ենք, ինչ հնարավորություններ կան, որոնք են այդ հնարավորություններից սկզբունքորեն տեսանելի ապագայում հետագայում իրագործելի, ինչ արգելքներ կան, որ խանգարում են դրա իրականացմանը: