ՄՄ երկրների հետ առևտրում անուղղակի հարկերը սահմանին չեն գանձվի

Մաքսային միության մաքսային օրենսդրությունը գրեթե չի տարբերվում Հայաստանի Հանրապետությունում գործողից: Այդ մասին փետրվարի 24-ին հրավիրած ասուլիսին նշեց ՀՀ ֆինանսների նախարարի տեղակալ, Մաքսային և հարկային, մակրոտնտեսական քաղաքականության և մաքսատուրքերի բաշխման հարցերով աշխատանքային խմբերի ղեկավար Սուրեն Կարայանը:

Նա նշեց, որ ՄՄ-ին անդամակցելուց հետո անուղղակի հարկերի գանձման հարցում որոշակի փոփոխություններ պետք է իրականացվեն: «Մաքսային միության անդամ երկրների միջև մաքսային սահմաններ գոյություն չեն ունենալու, այսինքն' ապրանքները տեղաշարժվելու են ազատ, առանց մաքսազերծման, իսկ ավելացված արժեքի հարկի և ակցիզային հարկի մասով ներկայում գործող մեր օրենսդրությամբ նախատեսված է, որպեսզի այդ հարկատեսակները գանձվեն Հայաստան ներմուծման պահին, սահմանին»,- Կարայանը՝ հավելելով, որ Մաքսային միության անդամ երկրների ներսում ապրանքների տեղաշարժի ժամանակ անուղղակի հարկեր չեն գանձվում սահմանին, այլ դրանք հարկային մարմիններում վճարվում են մինչև հաջորդ ամսվա 20-ը:

ՀՀ նախագահ Սերժ Սարգսյանը սեպտեմբերի 3-ին Մոսկվայում հայտարարել է Մաքսային միությանը միանալու վերաբերյալ Հայաստանի Հանրապետության որոշման և այդ նպատակով անհրաժեշտ կատարելիք քայլերը ձեռնարկելու, իսկ հետագայում՝ Եվրասիական տնտեսական միության ձևավորմանը մասնակցելու մասին: Դեկտեմբերի 24-ին Մոսկվայում տեղի ունեցավ ՄՄ անդամ պետությունների ղեկավարների հանդիպումը, որի ժամանակ ստորագրվեց նաեւ Հայաստանի Մաքսային միությանն անդամակցելու համար նախատեսված ճանապարհային քարտեզը: