Կառավարության գործունեության երեք առաջնահերթություններն` ըստ Տիգրան Սարգսյանի

Հայաստանի Հանրապետության Կառավարության թիվ 1 խնդիրը տնտեսության մեջ հավասար մրցակցային դաշտի ապահովումն է, ինչպես նաև ֆինանսական միջոցների արդյունավետ վերաբաշխումն ու մարդկանց ինտելեկտուալ կարողությունների զարգացումը:

Այդ մասին մարտի 4-ին նշեց ՀՀ վարչապետ Տիգրան Սարգսյանը Հայաստանի ազգային մրցունակության հինգերորդ զեկույցի ներկայացմանը նվիրված միջոցառմանը:

Նա ուշադրություն հրավիրեց Ազգային ժողով ներկայացված և հաստատված կառավարության ծրագրին: «Պատգամավորները մեր առջև մի խնդիր էին դնում, որ մենք ինքներս տանք այն չափանիշը, որով գնահատվելու է կառավարության գործունեության հաջողությունը: Ո՞րն է այն չափանիշը, որով մենք կարող ենք գնահատել, որ հինգ տարիների ընթացքում կառավարությունն արձանագրում է հաջողություն կամ ձախողում: Քննարկումների արդյունքում արձանագրեցինք, որ համար մեկ խնդիրը լինելու է մրցակցային արդար դաշտի ձևավորումը»,- ասաց վարչապետը՝ հավելելով, որ այդ ոլորտում էական և շոշափելի հաջողություն արձանագրելը թույլ կտա ասել, որ կառավարությունն իր 5 տարվա հիմնական առաքելությունն իրականացրել է:

Վարչապետը պարզաբանեց, որ հավասար մրցակցային դաշտը տնտեսության շարժիչն է: Օրինակ բերեց մեքենան, որի բոլոր մասերը պատշաճ վիճակում են, սակայն չաշխատող շարժիչի պարագայում մեքենան պիտանի չէ շահագործման համար: «Տնտեսական համակարգի շարժիչը հավասար պայմաններն են տնտեսություն վարող սուբյեկտների համար, ընդ որում, այդ հավասար պայմանների ազդեցությունը տնտեսական արդյունքների վրա շատ ավելի էական է, քան մնացած գործոնների ազդեցությունը»,-ընդգծեց Սարգսյանը:

Վարչապետը կառավարության երկրորդ առանցքային խնդիրը ֆինանսական միջոցների արդյունավետ վերաբաշխումն է համարում: «Այդ ֆինանսական միջոցների վերաբաշխման արդյունքում մենք պետք է լուծենք կարևորագույն քաղաքական խնդիր, այն է՝ փոքր և միջին ձեռնարկատիրության զարգացումը: Սա ոչ միայն տնտեսական այլ նաև քաղաքական լուրջ բովանդակություն ունեցող հարցադրում է, քանի որ քաղաքացիական հասարակություն չի կարող ձևավորվել առանց միջին խավի»,-նշեց կառավարության ղեկավարը:

Կառավարության երրորդ խնդիրը վարչապետը համարում է ինտելեկտուալ կարողությունների ձևավորումը: «Մենք կարիք ունենք բարձր որակավորում ունեցող մասնագետների, բայց բարձր որակավորում ունեցող մասնագետները շատ ավելի մոբիլ են»,- ասաց վարչապետը՝ հավելելով, որ բիզնես միջավայրում հավասար մրցակցային պայմաններ չստեղծելու պարագայում մասնագետները չեն կարողանում զարգացնել իրենց ինտելեկտուալ կարողությունները, ինչը հանգեցնում է նրանց արտագաղթին:

Տիգրան Սարգսյանը նշեց, որ առանց կառավարության մասնակցության հնարավոր չէ հաջողության հասնել հավասար բիզնես միջավայրի ձևավորման գործում: Կառավարությունն իրավունք չունի «ձեռքերը լվանալ» և այդ միջավայրի ձևավորումը թողնել բիզնեսի ուսերին: Նա հիշեցրեց, որ Կառավարությունը որդեգրել է ակտիվ արդյունաբերական քաղաքականություն՝ գերակա ճանաչելով տնտեսական գործունեության 11 ոլորտ:

«Ի-Վի Քոնսալթինգ» ընկերությունը և «Տնտեսություն և արժեքներ» հետազոտական կենտրոնը մարտի 4-ին ներկայացրին Հայաստանի ազգային մրցունակության հինգերորդ զեկույցը՝ «Աճի հրամայականը և խոչընդոտները» թեմայով: Զեկույցի թեման երկարաժամկետ և կայուն աճը զսպող առանցքային սահմանափակումների բացահայտումն է: Զեկույցը նպատակաուղղված է պետական և մասնավոր հատվածների միջև երկխոսության ձևավորմանը՝ նպաստելով աճի առանցքային սահմանափակումների վերացմանն ուղղված օրակարգի մշակմանը: