Ծաղկի խանութներն ու ջերմոցները մարտի 8-ին ծաղիկների գները չեն թանկացնի

Հայաստանում ծաղիկ վաճառող խանութներն ու ջերմոցները հակված չեն Կանանց տոներին ընդառաջ բարձրացնել ծաղիկների գները: Տոներին ծաղիկների թանկացման մեղքն ընկնում է վերավաճառողների վրա, ովքեր օգտվում են առիթից և փորձում գերշահույթներ ստանալ: Միաժամանակ, ծաղկավաճառության ոլորտը չի գտնվում ՏՄՊՊՀ վերահսկողության ներքո, ինչը կարող է նպաստել գներն անհիմն բարձրացնելու գայթակղությանը չդիմանալուն: 

Ծաղկի խանութները հակված չեն գների բարձրացման 

«Բրաբիոն» ուսումնական կենտրոնի տնօրեն Մարիամ Պիվազյանն «Արմենպրես»-ի հետ զրույցում նշեց, որ իրենք, կանանց տոներին ընդառաջ, չեն բարձրացնելու վաճառվող ծաղիկների գները: «Մենք փորձում ենք ամբողջ տարվա ընթացքում պահպանել գների նույն մակարդակը»,-նշեց տնօրենը՝ հավելելով, որ իրենք, փոխարենը, տոներին շատացնում են վաճառվող ապրանքատեսականին:

«Պասիֆլորա» ծաղկի խանութի տնօրեն Գարի Բակունցը հայտնեց, որ իրենք ընդհանրապես չեն թանկացնում ծաղիկները: Տնօրենը պարզաբանեց, որ իրենք ունեն վաճառքի որոշակի տոկոս, որը դնում են ծաղկի վրա: «Եթե մատակարարները թանկացնեն, բնականաբար, մեզ մոտ էլ կթանկանա»,- նշեց  Բակունցը:

Ծաղկավաճառության ոլորտը ՏՄՊՊՀ վերահսկողության դաշտում չի գտնվում 

ՀՀ տնտեսական մրցակցության պաշտպանության պետական հանձնաժողովի մամուլի քարտուղար Գայանե Սահակյանը «Արմենպրես»-ի հետ զրույցում նշեց, որ տոներին ՏՄՊՊՀ-ն ուժեղացնում է վերահսկողությունը սննդի ապրանքային շուկաների նկատմամբ, սակայն մարտի 8-ը չի պատկանում այն տոների թվին, երբ ՏՄՊՊՀ-ն անցնում է ամենօրյա մոնիթորինգի: Նա պարզաբանեց, որ մարտի 8-ին Հանձնաժողովի ուսումնասիրության դաշտում գտնվող ապրանքների սպառումը կտրուկ չի բարձրանում, այսինքն` մարդիկ չեն սկսում ավելի շատ կաթնամթերք կամ բրինձ գնել: «Մարտի 8-ին հիմնականում սպառվում ե ն ծաղիկներ կամ այլ նման ապրանքներ, ինչը Հանձնաժողովի վերահսկողության դաշտում չի գտնվում»,-նշեց Սահակյանը՝ հավելելով, որ շուկաների մշտադիտարկումը մայրաքաղաքի 4 սուպերմարկետներում (օրենքով գերիշխող ճանաչված) իրականացվում է շաբաթական 3 անգամ՝ անկախ տոներից:

ՏՄՊՊՀ մամուլի քարտուղարը հիշեցրեց, որ կառույցը գնային վերահսկողություն չի կատարում, այլ միայն ուսումնասիրում է շուկայում գների բարձրացումը, քանի որ այս կամ այն ապրանքի գնի բարձրացումը կարող է որոշակի չարաշահումների ազդակ հանդիսանալ: 

Ծաղիկ աճեցնող ջերմոցների մի քանի ներկայացուցիչներ նշեցին, որ իրենք առիթից չեն օգտվում և տոնական օրերին ծաղկի գները չեն բարձրացնում: Ջերմոցատերերը խորհուրդ տվեցին տոնական օրերին գների բարձրացման մեղավորներին փնտրել վերավաճառողների շրջանում:

 Ծաղիկների տեղական արտադրությունը վերելք է ապրում

 Հարկ է նշել, որ անցյալ տարի, 2012 թվականի համեմատ, Հայաստանից ծաղիկների արտահանումն ավելացել է 52.4 տոկոսով և գերազանցել 3.7 միլիոն հատը: Արտահանված ծաղիկների մաքսային ընդհանուր արժեքը գերազանցել է 2 միլիոն դոլարը: Միաժամանակ, նախորդ տարի մեր երկիր բերվող ծաղիկների քանակը նվազել է 44 տոկոսով և դարձել 630 հազար 600 հատ: Նշված տվյալներից կարելի է եզրակացնել, որ մեր երկրում ծաղիկների արտադրության դեֆիցիտով պայմանավորված գնի բարձրացումը քիչ հավանական է: Հայաստանում ծաղկեփնջերի ու ծաղկային կոմպոզիցիաների գնային միջաայքը լայն է. այն սկսվում է մի քանի հազար դրամից և հասնում մի քանի տասնյակ հազարի:

Ստեղծված իրավիճակում մնում է հուսալ, որ ոլորտում միջնորդ կազմակերպություններն ու անհատները չեն օգտվի պատեհ առիթից և կանանց միամսյակի ընթացքում ծաղիկները ոսկու գնով չեն վաճառի: