Արտարժույթի փոխանակման կետերն իրավունք չունեն գնանշել արժույթը և չվաճառել այն. ԿԲ

Արտարժույթի փոխանակման կետն իրավունք չունի գնանշել արժույթը և չիրականացնել դրա վաճառքը: Նման գործունեություն իրականացնելը խախտում է: Այդ մասին «Արմենպրես»-ի հետ զրույցում նշեց ՀՀ Կենտրոնական բանկի փոխանակման կետերի վերահսկողության բաժնի աշխատակից Գայանե Սարգսյանը՝ անդրադառնալով գործակալության դիտարկմանը, թե Երևանում տարադրամի փոխանակման բազմաթիվ կետերում բրիտանական ֆունտ ստերլինգ չեն վաճառում' չնայած այդ արժույթը գնանշված է փոխարժեքի սանդղակում: «Եթե իրենք ցուցանակի վրա արժույթի գրանցումն իրականացնում են, ապա պետք է վաճառեն: Եթե նրանք չունեն իրենց դրամարկղում ֆունտ ստերլինգ, ապա ցուցանակի վրա պետք է գնանշում չլինի»,- նշեց Սարգսյանը՝ հավելելով, որ վերոնշվալ երևույթը համարվում է խախտում:

ԿԲ աշխատակիցը նշեց, որ Արժութային կարգավորման մասին օրենքը, որի համաձայն փոխանակման կետերը ենթարկվում են պատասխանատվության, կոնկրետ չի տարանջատում խախտման տեսակը՝ այլ առանձնացնում է առաջին, երկրորդ և երրորդ խախտում հասկացությունները: «Եթե դա առաջին դեպքն է, փոխանակման կետը ստանում է նախազգուշացում անկախ այն հանգամանքից, թե ինչ խախտում է կատարել»,-նշեց աշխատակիցը՝ հավելելով, որ նախազգուշացում ունենալու դեպքում երկրորդ խախտումն իրականացնելը մեկ տարվա մեջ ենթարկվում է մինչև մեկ տարի ժամանակով լիցենզիայի կասեցման կամ երկու միլիոն դրամ տուգանքի (նվազագույն աշխատավարձի 2000-պատիկի չափով):

Փոխանակման կետի կողմից մեկ տարվա ընթացքում երրորդ անգամ խախտում կատարելու պարագայում տուգանքի չափը կազմում է նվազագույն աշխատավարձի 4000-պատիկի սահմաններում, կամ դա կարող է հանգեցնել ընդհուպ լիցենզիան ուժը կորցրած ճանաչելուն:

Հիշեցնենք, որ գործակալության թղթակիցը 4 օր (մարտի 6-9) եղել է Մաշտոցի պողոտայում, Իսահակյան, Թումանյան, Խանջյան փողոցներում, ինչպես նաև մայրաքաղաքի մի շարք խոշոր սուպերմարկետներում տեղադրված տարադրամի փոխանակման կետերում և չի գտել գեթ մի տեղ, որտեղ վաճառեին բրիտանական արժույթ : Միաժամանակ բոլոր դիտարկված կետերում ֆունտ ստերլինգը գնանշված է եղել փոխարժեքի սանդղակում, և դրա առքի ու վաճառքի գների տարբերությունը կազմել է 20-30 դրամ: Բանկերում ֆունտի առկայության դիտարկում չի կատարվել:

ՀՀ Կենտրոնական բանկը բրիտանական ֆունտ ստերլինգ/հայկական դրամ փոխարժեքը մարտի 10-ի համար սահմանել է 694.27 դրամ: Միջազգային ֆորեքս շուկայում, մարտի 10-ի տվյալներով, բրիտանական 1 ֆունտ ստերլինգի դիմաց տալիս են 1.67 ԱՄՆ դոլար՝ փետրվարի սկզբի'1.62-ի և օգոստոսի սկզբի 1.5-ի դիմաց: Այսինքն' ֆունտ/դոլար փոխարժեքը վերջին ամիսներին դրսևորում է աճի միտում: