Երևանում հաշվառվել է 3750 գլուխ խոշոր եղջերավոր անասուն

Հայաստանում աճել է բոլոր տեսակի անասունների գլխաքանակը՝ բացի խոզերից: ՀՀ ազգային վիճակագրական ծառայության տվյալներով, Հայաստանի Հանրապետությունում 2014 թվականի հունվարի 1-ի դրությամբ խոշոր եղջերավոր անասունների գլխաքանակն ավելացել է 2.5 տոկոսով և հասել 677 հազար 584 հատի, որից 309 հազար 616-ը՝ կով (կովերի գլխաքանակի աճը՝ 2.1 տոկոս): Խոզերի գլխաքանակը նվազել է 3.6 տոկոսով և դարձել 139 հազար 799, իսկ ոչխարներինն ու այծերինն ավելա ցել է 6.3 տոկոսով և հասել 717 հազար 574 գլխի, որից 30 հազար 500-ը՝ այծ:

Խոշոր եղջերավորի գլխաքանակով առաջատարը Գեղարքունիքի մարզն է (115 հազար 619 գլուխ), այնուհետև Շիրակի (107 հազար 097 գլուխ) և Արագածոտնի (85 հազար 263 գլուխ) մարզերը: Խոշոր եղջերավորի գլխաքանակով մարզերի մեջ ետնապահ են Տավուշը (37 հազար 72 գլուխ) և Վայոց ձորը (22 հազար 749): Երևանում հունվարի 1-ի դրությամբ հաշվառվել է 3 հազար 750 գլուխ խոշոր եղջերավոր անասուն:

Խոզաբուծության բնագավառում առաջատարն Արմավիրի մարզն է այդ կենդանիների գլխաքանակի հետաքրքրաշարժ թվով՝ 19 հազար 999, երկրորդ տեղում է՝ Արարատի մարզը՝ 19 հազար 434 գլուխ, իսկ երրորդում՝ Տավուշը՝ 16 հազար 894 գլուխ: Ուշագրավ է, որ Երևանում ավելի շատ խոզ են բուծում (6 հազար 478 գլուխ), քան Վայոց ձորի մարզում (1890 գլուխ):

Մեր երկրում ոչխարների ու այծերի գլխաքանակով առաջատարը Սյունիքի մարզն է՝ 114 հազար 655 գլուխ (նախորդ տարվա համեմատ աճը՝ 12.9 տոկոս): Ոչխարների և այծերի բազմացման գործում նշանակալի է Գեղարքունիքի մարզի ցուցանիշը` 102 հազար 613 գլուխ և Արագածոտնի ցուցանիշը՝ 96 հազար 766 գլուխ:

Վայոց ձորի և Տավուշի մարզերը հանրապետությունում ետնապահ են նաև ոչխարների ու այծերի գլխաքանակի առումով. Համապատասխանաբար, 23 հազար 97 և 16 հազար 170 գլուխ, իսկ ամբողջ Երևան քաղաքում բուծում են ընդամենը 20 գլուխ այծ և 6 հազար 277 գլուխ ոչխար: