Ձկնաբույծների միության նախագահը համագործակցության ձեռք է մեկնում Կառավարությանը

Հայաստանում ձկնաբուծական ոլորտին վերաբերող խնդիրները լուծելու համար անհրաժեշտ է, որպեսզի Կառավարությունն ու Ձկնաբույծների միությունը սերտորեն համագործակցեն: Երկրում կան մի քանի հարյուր ինքնաշատրվանվող հորեր, որոնց ջուրն անտեղի հոսում է Նախիջևան: Ոլորտում առկա խնդիրները չլուծելը սպառնում է ձկնաբուծական տնտեսությունների մինչև 85 տոկոսի կորստով:

Այդ մասին «Արմենպրես»-ի հետ զրույցում նշեց Հայաստանի ձկնաբույծների միության նախագահ Արթուր Աթոյանը: Նա հայտնեց, որ ոլորտում ջրի թանկացումը խնդիրներ է ստեղծում ձկան արտադրության համար: Նա հիշեցրեց հանրապետության բարձրագույն ղեկավարության կողմից դրված խնդիրը՝ 70 տոկոսով կրճատել օգտագործվող ջրային ռեսուրսները: Նա նշեց նաև ոլորտում սպասվող լիցենզավորման գործընթացները: «Մեր ոլորտը լիցենզավորման ընթացակարգ անցնելու համար պետք է բավականին նախապատրաստական գործընթացներ անցնի, պետք է տնտեսությունները նախապատրաստեն լիցենզավորման պահանջներին և այնպես անենք, որ ձկնաբուծական տնտեսությունները չընկնեն ցնցումների մեջ»,- նշեց Աթոյանը:

Միության նախագահը նշեց, որ ոլորտում առկա խնդիրների լուծումը տեսնում են պետության հետ համատեղ գործունեության և իրենց կարծիքը հաշվի առնելու շնորհիվ: Աթոյանը հայտնեց, որ իրենց հետ աշխատում է միայն Գյուղատնտեսության նախարարությունը, և մյուս գերատեսչություններում կատարվող գործընթացներին իրենք անմասն են: «Մենք ակնկալում ենք, որ մեզ հետ համագործակցեն, որպեսզի առանց մեզ տեղեկացնելու, մեր կարծիքը հարցնելու, մեր ոլորտին վերաբերող խնդիրներ, օրենքների նախագծեր, կառավարության որոշումներ չընդունվեն»,- ասաց Աթոյանը՝ հավելելով, որ միայն երկու կողմերի կարծիքը հաշվի առնելը թույլ կտա գտնել արդյունավետ և բազմաշահավետ լուծումներ:

րա խոսքով, Կառավարության հետ համատեղ աշխատանքը, ուսումնասիրություններն ու քննարկումները թույլ կտան գտնել ցանկացած խնդրի լուծման ոսկե միջինը՝ խնայելով ջրային ռեսուրսները և կանխելով ձկնաբուծական տնտեսությունների քայքայումը:

Միության նախագահն անդրադարձավ նաև ջրային պաշարների գույքագրման խնդրին: Նրա տվյալներով, ջրային պաշարների գույքագրում վերջին անգամ անցկացվել է 1984 թվականին: Նա նշեց, որ երկրում կան 567 ինքնաշատրվանող հորեր, որոնք ոչ մեկի կողմից չեն օգտագործվում և դաշտերում գիշեր ու զոր արտահոսում են, լցվում Արաքս գետն ու հեռանում Նախիջևան: «Ինքնաշատրվանող 43 հորեր ունենք, որոնք գտնվում են մեր ձկնաբուծական տնտեսություններում: Դրանց մի մասը տիրազուրկ է, մի մասը՝ ապօրինի: Ես մեր իշխանություններին խնդրում եմ, որ այդ 43 հորերի մասով համաներում հայտարարեն, թույլտվություն տան շահագործելու»,- նշեց Աթոյանը՝ հավելելով, թե իրենք զարմացած են, որ գոյություն ունեցող հորերը փակում են, սակայն նոր թույլտվություններ են տալիս:

Հայաստանի ձկնաբույծների միության կազմում են Հայաստանում գործող 170 ձկնաբուծական տնտեսություններից 85-ը:

Հայաստանից ձուկն արտահանվում է հիմնականում Ռուսաստան: Նախորդ տարի,2012 թվականի համեմատ, Հայաստանից Ռուսաստան ձկան արտահանումն աճել է 32 տոկոսով և հասել 2 հազար 193 տոննայի: Անցյալ տարի մեր երկիր է ներկրվել 2 հազար 142.2 տոննա սառեցրած և 9.8 տոննա թարմ կամ պաղեցրած ձուկ: