Ձորաղբյուրում բրուցելյոզի հիվանդացության իրավիճակը վերահսկելի է

Ձորաղբյուրում գրանցված կենդանիների բրուցելյոզ հիվանդության հետ կապված իրավիճակը վերահսկելի է, լիազոր մարմինները համապատասխան աշխատանքներ են տանում: Այդ մասին «Արմենպրես»-ի հետ զրույցում նշեց ՀՀ գյուղատնտեսության նախարարի առաջին տեղակալ Գրիշա Բաղիյանն՝ անդրադառնալով այդ հիվանդության բռնկումներին և ընդհանուր համաճարակային վիճակին: Նա նշեց, որ բրուցելյոզը Հայաստանում միշտ էլ եղել է ու կա: «Հիվանդությունը Ձորաղբյուրում հայտնաբերել են մեր նախարարության համապատասխան ՊՈԱԿ-ի մասնագետները՝ հետազոտությունների արդյունքում: Իհարկե պատահում է, ժամանակ առ ժամանակ բռնկումները շատանում են, բայց իրավիճակը վերահսկելի է, տեղերում անասնաբույժներն իրենց աշխատանքները տանում են»,-նշեց Բաղիյանը՝ հավելելով, որ հիվանդության տարածման դեմ պայքարի հիմնական մեթոդը հիվանդ կենդանուն սպանդի ենթարկելն է: «Եթե մանր եղջերավոր կենդանի է, միսը կարելի է օգտագործել միայն եփված, վերամշակված վիճակում, իսկ խոշոր եղջերավորներինը՝ առանց սահմանափակումների կարելի է օգտագործել»,-նշեց փոխնախարարը:

ՀՀ գյուղատնտեսության նախարարության սննդամթերքի անվտանգության պետական ծառայությունից մարտի 3-ին տեղեկատվություն է ստացվել, որ ՀՀ-ում «Գյուղատնտեսական կենդանիների պատվաստում» ծրագրի շրջանակներում իրականացվող աշխատանքների ընթացքում Կոտայքի մարզի Ձորաղբյուր համայնքի 17 բնակչի տնտեսություններում արձանագրվել են խոշոր եղջերավոր կենդանիների բրուցելոզ հիվանդության դեպքեր (36 գլուխ՝ լաբորատոր հետազոտությունների արդյունքում):

ՀՀ առողջապահության նախարարության մասնագետների կողմից տեղեկատվությունն ստանալուց անմիջապես հետո տեղում կազմակերպվել է համաճարակաբանական հետազոտություն վերը նշված 17 տնտեսությունում (93 անձանց շրջանում հարցում, դիտարկում և այլն), իրականացվել է 77 անձի արյան նմուշառում, ովքեր շփվել են հիվանդ կենդանիների հետ: Նրանց նկատմամբ սահմանվել է բժշկական հսկողություն: Արձանագրվել է բրուցելոզով մեկ հիվանդ, որի տնտեսությունում եղել է հիվանդ կով և այն սպանդի է ենթարկվել: Հիվանդն առողջացումով դուրս է գրվել «Նորք» ինֆեկցիոն հիվանդանոցում բուժում ստանալուց հետո: Լաբորատոր հետազոտությունները շարունակվում են: Մյուս անձանց վերջնական ախտորոշումը պարզ կլինի կրկնակի հետազոտությունների արդյունքում (քանի որ հնարավոր է բրուցելոզով վարակվածների մոտ հիվանդության զարգացման արդյունքում հակամարմինների տիտրի աճ գրանցվի): Բնակչության շրջանում իրականացվել է բժշկահիգիենիկ գիտելիքների տարածում և առողջ ապրելակերպի քարոզչություն՝ բրուցելոզի կանխարգելման հարցերի վերաբերյալ: