Գրիշա Բաղիյանը Մաքսային միությանը Հայաստանի անդամակցումից ակնկալում է կարտոֆիլի ցանքատարածությունների ավելացում

Մաքսային միության անդամ դառնալը հնարավորություն կտա բարձրացնել հայկական գյուղմթերքի մրցունակությունը, իսկ այդ մթերքի պահանջարկի ավելացումը կնպաստի Հայաստանում աճեցվող մշակաբույսերի ցանքատարածությունների ընդլայնմանը:

Այդ մասին «Արմենպրես»-ի հետ զրույցում նշեց ՀՀ գյուղատնտեսության նախարարի առաջին տեղակալ Գրիշա Բաղիյանը՝ անդրադառնալով Մաքսային միությանը Հայաստանի անդամակցության պարագայում գյուղմթերքի արտադրության և արտահանման ավելացման ու դրա հետևանքով տեղական շուկայում հնարավոր դեֆիցիտից խուսափելու հարցին (մասնավորապես' կարտոֆիլի): «Վերջին 3-4 տարում արտադրված կարտոֆիլը հնարավորություն է տալիս մեզ բավարարել մեր պահանջարկը և ավելցուկը վաճառել: Նույնիսկ կասեի, որ եղել են տարիներ, երբ հնարավոր չի եղել արտահանումն իրականացնել, և մեր որոշ տնտեսություններ կարտոֆիլը որպես անասնակեր են օգտագործել»,- ասաց Բաղիյանը՝ հավելելով, որ Մաքսային միության անդամ դառնալով, Հայաստանը հնարավորություն կունենա ազատ և շատ հանգիստ իր արտադրած մթերքն իրացնել կառույցի անդամ երկրներում: Փոխնախարարը համոզված է, որ Մաքսային միությանն անդամակցելը թույլ կտա բարձրացնել տեղական արտադրանքի մրցունակությունը: «Մաքսային միության մեջ մտնող երկրները պարտավորված են առաջին հերթին մեր արտադրանքն առնել, որից հետո' մյուս երկրների: Այսինքն' մեր երկրի արտադրանքը մրցունակ կլինի, քանի որ առաջին հերթին վաճառվելու է այդ երկրներում: Սա էլ հնարավորություն կտա, որպեսզի մենք ավելի շատ արտադրենք»,- ասաց Գյուղատնտեսության փոխնախարարը:

Նրա խոսքով` օգտագործելով առկա հնարավորությունների 80-90 տոկոսը, Հայաստանում տարեկան արտադրվում է 660 հազար տոննա կարտոֆիլ, ինչը բավարարում է և′ տեղական շուկայի պահանջարկը, և′ հնարավորություն է տալիս արտահանել: Բաղիյանը նշեց, որ Հայաստանում դեռ չօգտագործվող շատ հողեր կան: «Եթե պահանջարկը եղավ, իրացման հարցը լուծվեց, այդ ռեզերվային հողերն էլ կօգտագործվեն, որպեսզի արտադրանքի քանակն ապահովվի»,-նշեց Բաղիյանը:

2013 թվականին մեր երկրից արտահանվել է 23.5 հազար տոննա կարտոֆիլ, ինչը 22 անգամ գերազանցել է 2012 թվականի ցուցանիշը: Կարտոֆիլն արտահանվել է հիմնականում Ռուսաստան: