Հայաստանի գյուղատնտեսության նախարարությունն ավարտել է ՄՄ «ճանապարհային քարտեզի» մարտյան միջոցառումները

ՀՀ գյուղատնտեսության նախարարությունն արդեն ավարտել է Մաքսային միությանը Հայաստանի անդամակցության «ճանապարհային քարտեզով» նախատեսված հիմնական միջոցառումները և համապատասխան փաստաթղթերն ուղարկել է Մոսկվա: Այդ մասին «Արմենպրես»-ի հետ զրույցում հայտնեց ՀՀ գյուղատնտեսության նախարարի առաջին տեղակալ Գրիշա Բաղիյանը՝ անդրադառնալով Մաքսային միությանը Հայաստանի անդամակցության ուղղությամբ գերատեսչության քայլերին:

Նա հիշեցրեց, որ Մաքսային միությանն անդամակցության «ճանապարհային քարտեզով» ագրոարդյունաբերական համալիրի բնագավառում նախատեսված է իրականացնել 7 միջոցառում: Դրանցից երեքը նախատեսված էր մինչև փետրվարի 28-ը, մյուս երեքը' մինչև մարտի 31-ը, մեկն էլ՝ ամբողջ տարվա ընթացքում: Նա նշեց, որ փետրվարի 28-ին նախատեսված միջոցառումները Գյուղատնտեսության նախարարությունն իրականացրել է: «Եվրասիական տնտեսական հանձնաժողովի համապատասխան մասնագետները եղել են մեզ մոտ՝ Ագրոարդյունաբերական դեպարտամենտի պետի տեղակալի գլխավ որությամբ: Քննարկումները կատարել ենք և մինչև փետրվար մեր կատարած աշխատանքներից գոհ են եղել, այն, ինչ պահանջվում է, ամբողջությամբ ներկայացրել ենք: Այսօր մենք ավարտում ենք մարտին նախատեսված բոլոր աշխատանքները»,-նշեց փոխնախարարը:

Բաղիյանը մանրամասնեց, որ «ճանապարհային քարտեզով» տարբեր բնագավառի միջոցառումներ կան, այդ թվում' երրորդ երկրների հետ Գյուղատնտեսության նախարարության համաձայնագրերի ուսումնասիրություն, այդ համաձայնագրերում Մաքսային միությանը միանալու խոչընդոտների առկայության պարզում: «Մենք այդ ամբողջ փաթեթն ուսումնասիրել ենք և համոզվել, որ խոչընդոտներ չեն լինի»,- ասաց Բաղիյանը:

ՄՄ անդամակցության «Ճանապարհային քարտեզով» նախատեսված է նաև պետության կողմից գյուղատնտեսությանը տրվող ամբողջ աջակցության վերլուծություն 2011-2013 թվականներին, ինչպես նաև այդ ուղղությամբ Կառավարության որոշումների և Ազգային ժողովի ընդունած օրենքների վերլուծություն: «Մաքսային միությանը միանալու հարցում Գյուղատնտեսության նախարարությանը վերապահված աշխատանքներն իրականացված են, և վերջնական փաթեթը մենք ուղարկելու ենք Մոսկվա»,-հայտնեց Բաղիյանը:

ՀՀ նախագահ Սերժ Սարգսյանը 2013թ. սեպտեմբերի 3-ին Մոսկվայում հայտարարել է Մաքսային միությանը միանալու վերաբերյալ Հայաստանի Հանրապետության որոշման և այդ նպատակով անհրաժեշտ կատարելիք քայլերը ձեռնարկելու, իսկ հետագայում՝ Եվրասիական տնտեսական միության ձևավորմանը մասնակցելու մասին: Դեկտեմբերի 24-ին Մոսկվայում տեղի է ունեցել ՄՄ անդամ պետությունների ղեկավարների հանդիպումը, որի ժամանակ ստորագրվել է նաև Հայաստանի Մաքսային միությանն անդամակցելու համար նախատեսված ճանապարհային քարտեզը: ՀՀ կառավարությունը հաստատել է դրա իրականացման միջոցառումների ծրագիրը և հայտարարել, որ միջոցառումների 50 տոկոսն արդեն ավարտվել է: