Գյուղատնտեսության փոխնախարարը Զատկին ձվի շուկայում խնդիրներ չի կանխատեսում

Սուրբ Հարության տոնին, որը նշվելու է ապրիլի 20-ին, Հայաստանում ձվի մատակարարման հետ կապված խնդիրներ չեն լինի: Այդ մասին «Արմենպրես»-ի հետ զրույցում հայտնեց ՀՀ գյուղատնտեսության նախարարի առաջին տեղակալ Գրիշա Բաղիյանը' անդրադառնալով տոներին ձվի շուկայում շարունակ նկատվող անցանկալի երևույթներին: Նա նշեց, որ Գյուղատնտեսության նախարարության անասնաբուծական վարչությունն աշխատանքներ է տանում, որպեսզի Զատկին անպայման բնակչությունն ապահովվի ձվով: Բացի այդ, նշված հարցը նախարարի ուշադրության կենտրոնում է: Փոխնախարարը հիշեցրեց Նոր տարվա նախօրյակին ձվի շուկայում առաջացած իրարանցման մասին:

«Այն ժամանակ ես եղել եմ մեր բոլոր թռչնաբուծարաններում: Մենք ոչ թե ձվի պակասություն ենք ունեցել, այլ մատակարարման ոչ ճիշտ կազմակերպում: Հարցն այն է, որ նախ այդ ժամանակ եղանակը շատ ցուրտ էր, և մեքենաները չեն հասցրել առավոտյան 8-9-ին ձուն հասցնել համապատասխան իրացման կետեր: Ձուն ժամը 11-12-ին էին տեղ հասցնում և դա որոշակի իրարանցում էր առաջացրել շուկայում»,- ասաց փոխնախարարը՝ հավելելով, որ եղել են դեպքեր, երբ ինքը խանութում ականատես է եղել, երբ մարդիկ բողոքել են ձվի բացակայությունից, սակայն կողքի խանութում այդ մթերքն առկա էր: Փոխնախարարը խորհուրդ տվեց նման դեպքերում, սուպերմարկետներից բացի, ձու փնտրել նաև շրջակա փոքր կրպակներում և շուկաներում:

ՀՀ ԿԱ Պետական եկամուտների կոմիտեի տվյալներով` 2013 թվականին Հայաստան է ներկրվել 18.5 միլիոն հատ ձու: ՀՀ ազգային վիճակագրական ծառայության տվյալներով` անցյալ տարի մեր երկրում արտադրվել է 615.2 միլիոն հատ ձու՝ 2012 թվականի 658.1 միլիոն հատի դիմաց: