Էրդողանը Թուրքիայում քաոսի համար ստեղծել է բոլոր պայմանները. Slate.fr

Համաշխարհային Մամուլ 21 Մարտ, 2014 13:54

Թուրքիայում վարչապետ Էրդողանի վարչակարգը խստացնում է դիրքը և կոռուպցիայի մեջ մեղադրանքների ֆոնին փակվում իր մեջ, այն դեպքում, երբ երկրի մյուս մասը ավելի շատ ազատություններ է պահանջում: Օդում լարվածություն է սավառնում, իսկ արմատական խմբերը սկսում են միմյանց հետ հաշիվ մաքրել: Եվ այդ ամենը տեղի է ունենում մարտի 30-ին անցկացվելիք տեղական ինքնակառավարման մարմինների ընտրություններից մի քանի օր առաջ: Ինչպես է բնութագրում ֆրանսիական Slate.fr լրատվական կայքը' անցյալ դեկտեմբերի կեսերին իշխանության ներկայացուցիչների մասնակցությամբ կոռուպցիոն սկանդալից հետո Թուրքիայում ստեղծված իրավիճակը.

«Քաղաքական իրադրությունը Թուրքիայում սրվում է: Դառնում է անգամ վտանգավոր: Անցյալ ամռանը Գեզի այգու հակակառավարական ցույցերում կարմիր հագուստով աղջկան, ում վրա ոստիկանն արցունքաբեր գազով բալոն էր ուղղել, երկրիը բոլորած բողոքի ակցիաներում փոխարինելու է եկել ոստիկանության արձակած նռնակից վիրավորվելու արդյունքում մահացած 14-ամյա Բերքինը: «Թայիփը մարդասպան է», «Բերքինն ամեն տեղ է, դիմադրությունն ամենուրեք է» լոզունգներով են Թուրքիայի 15-20 մլն ալավի (ավելի լիբերալ իսլամ դավանող) բնակչության ներկայացուցիչները, որոնց էր պատկանում նաև անչափահասի ընտանիքը, բողոքի ալիք բարձրացրել ամբողջ Թուրքիայով մեկ: Ոստիկանությունը դաժանորեն ցրում և ձերբակալում է ցուցարարներին: Վերջին 9 ամսում Էրդողանը միայն ամրապնդել է իր ավտորիտար իշխանությունը: Գեզիում իշխանության կոռուպցիայի մասին երկչոտ մեղադրանքները դեկտեմբերի 17-ին հրապարակված հեռախոսային խոսակցությունների հրապարակումից հետո վերածվել են Էրդողանի գլխավորած' իշխող «Արդություն և զարգացում» կուսակցության նկատմամբ բացահայտ մեղադրանքների, որոնք ստվեր են գցել Թուրքիայի վարչապետի, նրա քաղաքական և ընտանեական շրջապատի վրա: Սակայն Էրդողանը միանգամից հերքել դրանք և դրա փոխարեն փորձում է իրեն զոհ ներկայացնել' հայտարարելով ԱՄՆ-ի և Իսրայելի օժանդակությամբ իր նախկին իսլամիստական դաշնակիցների' «Գյուլենի շարժման» անդամների կողմից դավադրության մասին: Էրդողանն ակնարկում է, որ իրեն նույնպիսի ճակատագիր են պատրաստել, ինչ Եգիտպոսի նախագահ Մուրսիի համար, ով անցյալ հուլիսին պաշտոնանկ արվեց բանակի և ցուցարարների ճնշման տակ:

Դեկտեմբերին իշխանության ներկայացուցիչների, այդ թվում' որդու, փեսայի և դստեր խոշոր կոռուպցիոն գործարքների բացահայտումից հետո, Էրդողանը հայտարարել է, որ դրա հետևում կանգնած են «Գյուլենական համայնքի» հետեւորդները, որոնք ցանկանում են տապալել իր կառավարությունը: Դրանից հետո նա մասշտաբային մաքրում է կատարել իրավապահ մարմիններում, ինչի արդյունքում մի քանի հարյուր չինովնիկներ հեռացվել են աշխատանքից: Իրավիճակն ավելի է սրել Էրդողանի հանձնարարությամբ ռազմական հեղաշրջման փորձ նախապատրաստելու «Էրգենեկոն» դատական գործով ձերբակալված գեներալների և հասարակական գործիչների բանտերից ազատումը, ովքեր ժամանակին ձերբակալվել էին իր իսկ ցուցումով: Էրդողանի իշխանության տարիներին, երբ նա Աթաթուրքի ստեղծած աշխարհիկ Թուրքիան դեպի իսլամ տանելու քաղաքականություն է վարել, երկրում արմատապես տրամադրված երկու հատված է ստեղծել: Այդ երկու Թուրքիաների բախման հավանականությունն էլ ավելի կմեծանա, եթե Էրդողանը որոշի իր համար պահպանել վարչապետի պաշտոնը, որը նրան իրավաբանական անձեռնմխելիություն է երաշխավորում»,-գրում է ֆրանսիական կայքը և մեջբերում իր զրուցակիցների մեկի հետևյալ խոսքը. «Այդ բոլորը դեռ ծաղիկներն են: Իսկական խնդիրները կսկսվեն ՏԻՄ ընտրություններից հետո»: