Թուրքիայում Twitter-ի արգելափակումն ավելի է խորացրել Գյուլ-Էրդողան հակասությունը. Haberler.com

Համաշխարհային Մամուլ 21 Մարտ, 2014 16:07

Թուրքական կառավարության կողմից թուրք օգտատերերի համար Twitter սոցիալական ցանցի արգելափակումն ավելի է խորացրել վարչապետ Ռեջեփ Թայիփ Էրդողանի և նախագահ Աբդուլլահ Գյուլի միջև առկա գաղափարական հակասությունները: Նախագահ Գյուլը Էրդողանի կառավարության այդ որոշման առնչությամբ հայտարարել է, որ «սոցիալական մեդիա հարթակների ամբողջությամբ փակումը հավանության արժանի չէ»: Այս մասին հայտնում է թուրքական haberler.com լրատվական կայքը:

Այսպիսով, Գյուլ-Էրդողան հարաբերություններում առկա հակասությունն ավելացավ ևս մեկով: Թուրքիայում Էրդողանի գլխավորած կառավարության դեմ բարձրացած զանգվածային բողոքների առնչությամբ, ինչը Էրդողանը բնութագրել էր ԱՄՆ-ի և Իսրայելի կողմից հովանավորվող դրսի ուժ «Գյուլենական շարժման» գործ, նախագահ Գյուլը հայտարարել էր, որ «Թուրքիայում տեղի ունեցող վերջին իրադարձություններում «դրսի հետք չկա»: Ավելի վաղ Թուրքիայի նախագահը անհամաձայնություն էր հայտնել երկիրն ակնհայտորեն դեպի իսլամացում տանող Էրդողանի վարած ներքին քաղաքականության նկատմամբ:

Թուրքական որոշ ԶԼՄ-ներ արձանագրում են, որ Twitter-ի արգելափակումով Թուրքիան հայտնվեց խոսքի անազատության երկրների ցուցակում: Մասնավորապես, CNNTurk հեռուստաալիքն ուշադրության է հրավիրում այն հանգամանքի վրա, որ թե աշխարհի շատ երկրներ պարբերաբար պայքարել են սոցկայքերի դեմ, բայց ներկայումս սոցիալական կայքեր արգելափակող շատ քիչ երկրներ կան, և այդ քչերի մեջ արդեն իր տեղը զբաղեցրեց նաև Թուրքիան' Բիրմայի, Պակիստանի, Հնդկաստանի, Չինաստանի և Իրանի Իսլամական Հանրապետության կողքին:

«Ազատության տուն» անկախ փորձագիտական կազմակերպության 2013 թ. համար պատրաստած զեկույցում քննության է առնվել մի շարք պետությունների ազատության ինդեքսը համացանցի տիրույթում' մասնավորապես սոցիալական ցանցերում: Ըստ այդ զեկույցի, «համեմատաբար ազատ» կատեգորիայում 60 երկրների մեջ Թուրքիան զբաղեցրել է 38-րդ տեղը:

Սոցիալական մեդիայի հետ պայքարի մեջ մտած թուրքական իշխանությունները Twitter սոցիալական ցանցը Թուրքիայի տարածքում արգելափակել են անցած գիշեր: Թուրքիայի վարչապետն ավելի վաղ հայտարարել էր նաև YouTube և Facebook կայքերը փակելու մտադրության մասին: