Ջրի համաշխարհային օրը Կապանում կենցաղային աղբից մաքրվեց Վաչագան գետի հունը

Ջրի համաշխարհային օրվա կապակցությամբ մարտի 22-ին Կապանում անցկացվեց մեծ ակցիա' կենցաղային աղբից մաքրվեց քաղաքի միջով հոսող Վաչագան գետի հունը:

Նախքան մաքրման աշխատանքները սկսելը, Կապանի բժշկական կենտրոնի հարակից կամրջի տակ տեղադրվել է մետաղյա ցանց' աղբն իր վրա հավաքելու և այն գետի երկայնքով չտարածվելու նպատակով: Ցանցը պատրաստված է այնպես, որ չխանգարի գետի ձկների ազատ տեղաշարժը: Կամրջից ներքև էլ իրականացվել են գետի հունի մաքրման աշխատանքները:

Ակցիային մասնակցել է մոտ 100 հոգի' Կապանի կոմունալ ծառայության, «Դանդի Փրիշս Մեթալս Կապան» ՓԲԸ աշխատակիցներ, երիտասարդ կամավորներ' քաղաքում գործող ՀԿ-ներից, ուսումնական հաստատություններից, ում միացել է նաև ԵԱՀԿ-ի Կապանի' Օրհուսի բնապահպանական տեղեկատվական կենտրոնը: «Ակցիայի բոլոր մասնակցիները' մոտ 100 հոգի, ապահովվել են համապատասխան գործիքներով, անջրաթափանց երկարաճիտք կոշիկներով, ձեռնոցներով, մեծ տոպրակներով' աղբը լցնելու համար»,-«Արմենպրես»-ին տեղեկացրեց «Դանդի Փրիշս Մեթալս Կապա ն» ՓԲԸ բնապահպանության բաժնի աշխատանքների ղեկավար Հասմիկ Մկրտումյանը:

Բացի գետի հունը մաքրելուց Վաչագան գետի կամուրջների վրա փակցվել են 10-12 քարոզչական ցուցանակներ' «Գետը մաքուր պահեք», «Գետը աղբատեղի չէ» և այլ կոչերով: «Ուզում եմ կոչ անել բոլորին, որ գնահատեն մեր աշխատանքը և մաքուր պահեն գետը, որի աղտոտված վիճակը առաջին հերթին տգեղացնում է մեր քաղաքի արտաքին տեսքը»,-ասաց Մկրտումյանը: Նրա խոսքով, քանի որ քաղաքի միջով հոսում են երկու' Ողջի և Վաչագան գետերը, ապա դրանց հունի մաքրման աշխատանքներն այսուհետ շարունակական բնույթ են կրելու:

Կապանում անցկացված ակցիան նախաձեռնել են «Դանդի Փրիշս Մեթալս Կապան» ՓԲԸ-նն ու Կապանի քաղաքապետարանը: Օրվա առիթով նախօրեին ընկերության տեղեկատվական կենտրոնում անցկացվել էր բաց քննարկում' նվիրված ջրի հիմնախնդիրներին: