Պեկինում ընդհարումներ են տեղի ունեցել կորած Boeing-ի ուղևորների հարազատների և ոստիկանության միջև. Reuters

Պեկինում ընդհարումներ են տեղի ունեցել «Մալայզիայի ավիագծերի» կորած հանրանավի ուղևորների հարազատների և ոստիկանության աշխատակիցների միջև: Այս մասին հայտնում է Reuters գործակալությանը:

Մալայզիայի դեսպանատան մոտ սկսված անկարգություններին մասնակցել են տասնյակ մարդիկ: Մարտի 24-ին «Մալայզիայի ավիագծեր» ընկերությունը տարածել է հայտարարություն` հայտնելով, որ այդ ինքնաթիռում եղած բոլոր մարդիկ զոհվել են:

Boeing-ի ուղևորների ընտանիքների անդամները, որոնք հավաքվել էին դիվանագիտական ներկայացուցչության մոտ, ավիաընկերությունից և Մալայզիայի կառավարությունից պահանջել են, որ իրենց ստույգ տեղեկատվություն տրամադրեն ինքնաթիռի ճակատագրի մասին: Բողոքի ակցիայի մասնակիցները ջրով շշեր են նետել իրավապահ մարմինների աշխատակիցների վրա, որոնք շրջապատել էին դեսպանատունը:

Ոստիկաններին հաջողվել է հետ մղել բողոքավորներին:

Հիշեցնենք, որ Մալայզիայի ավիաընկերությանը պատկանող Boeing 777-200-ը մարտի 7-ին կատարում էր Կուալա Լումպուր-Պեկին երթուղով չվերթը: Ինքնաթիռում եղել են 227 ուղևոր և անձնակազմի 12 անդամ: Ինքնաթիռի հետ կապն ընդհատվել է Մալայզիայի մայրաքաղաքից թռչելուց հետո մոտավորապես երկու ժամ անց: