Էրդողանը Ֆեթուլլահ Գյուլենի «համայնքն» ահաբեկչական է անվանել. թուրքական ԶԼՄ-ներ

Թուրքիայի վարչապետ Ռեջեփ Թայիփ Էրդողանը հայտարարել է, որ Ֆեթուլլահ Գյուլենի «համայնքը» ահաբեկչական կազմակերպություն է: Այս մասին հաղորդում է թուրքական ԶԼՄ-ները, Էրդողանը հայտարարել է մարտի 30-ին անցկացվելիք տեղական ինքնակառավարման մարմինների ընտրությունների քարոզչական արշավի շրջանակում կիրակի Ստամբուլում անցկացված հանրահավաքի ժամանակ:

Նա ասել է, որ ընտրություններից հետո Գյուլենի «համայնքի» դեմ ավելի խիստ քայլեր է կատարելու: «Դա Փենսիլվանիայի «համայնք» չէ: Կազմակերպություն է: Նրանք այնպիսի բաներ են անում, որ բնութագրական են միայն ահաբեկչական կազմակերպությանը: Այս ընտրություններից հետո ավելի խիստ քայլեր ենք կատարելու»,-ասել է նա:

Նախկին համախոհներ, արդի իսլամի գաղափարախոսության քարոզիչ Ֆեթուլլահ Գյուլենի և Էրդողանի միջեւ հակասությունը վերածվել է թշնամանքի այն բանից հետո, երբ դեկտեմբերի կեսերին բացահայտվել են թուրքական կառավարության անդամների, ինչպես նաև Էրդողանի, նրա զավակների և մերձավորների անմիջական մասնակցությամբ խոշոր կոռուպցիոն գործարքներ: Համացանցում հայտնվել են այդ գործողությունները փաստող հեռախոսային զրույցների ձայնագրություններ: Դրանից հետո Էրդողանը հայտարարել է, որ ձայնագրությունների հետևում կանգնած է Ֆեթուլլահ Գյուլենի «համայնքը», որը ցանկանում է տապալել իր կառավարությունը: