Թուրքական ուղղաթիռներն ու տանկերը մտել են Սիրիա. հունական մամուլ

Թուրքական բանակի տանկերով և ուղղաթիռներով զինված ստորաբաժանումները մտել են Սիրիա և աջակցություն են ցուցաբերում սիրիացի ընդդիմադիրների «Ազատ Սիրիայի բանակ» կազմավորման զինյալներին: Նման հաղորդագրություն է տարածել Հունաստանի ռազմական շրջանակներին մոտ կանգնած defencenet.gr ինտերնետային կայքը:

Հաղորդագրության մեջ ասվում է, որ թուրքական տանկերն ու ուղղաթիռները Սիրիայի տարածքում օժանդակություն են ցուցաբերում «Ազատ Սիրիայի բանակ»-ին' Ալ Քաիդայի սիրիական թև «Իրաքի և Լևանտի իսլամական պետություն» կոչված խմբավորումների հետ Ալ Սահարայի և Քեսաբի տարածաշրջաններում ընթացող մարտերում: Նշվում է, որ Քեսաբի մոտակայքում հիշյալ խմբավորումների միջև թեժ մարտերը շարունակվում են, և թուրքական զինուժի աջակցությամբ արդեն ծանր հարված է հասցվել Սուլեյման շահի դամբարանից 4 կմ հեռավորության վրա գտնվող «Իրաքի և Լևանտի իսլամական պետություն» խմբավորման ստրաբաժանումներին:

Սիրիական ԶԼՄ-ները մարտի 26-ին հայտնել էին, որ Քեսաբի և Լաթաքիայի մոտ մարտերում 500-ից ավելի իսլամիստներ են ոչնչացվել:

Թուրքիայի արտաքին գործերի նախարար Ահմեդ Դավութօղլուն նախօրեին հայտարարել էր, որ Թուրքիան պատրաստ է պաշտպանելու Սիրիայի տարածքում գտնվող Սուլեյման շահի դամբարանը, որը հսկվում է թուրք զինվորների ջոկատի կողմից:

Թուրքիայի և Սիրիայի միջև 1921թ. ստորագրված և հետագայում Լոզանում ընդունված պայմանագրի համաձայն' Սուլեյման շահի դամբարանի գտնվելու վայրը համարվել է թուրքական հող: Հետագայում տարածքը կառուցված ջրամբարի տակ մնալու պատճառով Սուլեյման շահի դամբարանը 1973-ին տեղափոխվել է հյուսիս' թուրքական սահմանին մոտ, որը պահպանվում է թուրքական զինվորների կողմից: