ՄՄ-ին անդամակցելուց երկու-երեք տարի անց բոլորը կտեսնեն Հայաստանի ներդրումային գրավչությունը. Տատյանա Վալովայա

Մաքսային միությանն անդամակցելուց երկու-երեք տարի անց ակնհայտ կլինեն Հայաստանի ներդրումային գրավչությունները և իրականացվող ծրագրերը: Նման համոզմունք հայտնեց Եվրասիական տնտեսական հանձնաժողովի կոլեգիայի անդամ Տատյանա Վալովայան՝ «Հայաստան-Մաքսային միություն. հնարավորություններ և մարտահրավերներ» խորագրով ՀՀԿ երկրորդ տնտեսական համաժողովին հաջորդած մամուլի «ասուլիսում: «Արդեն հիմա ՌԴ-ն համարվում է Հայաստանի տնտեսության լրջագույն ներդրողը, երբ Հայաստանը դեռևս չի անդամակցել Մաքասային միությանը: Դրանից հետո ակնհայտորեն կմեծանա Հայաստանի ներդրումային գրավչությունը ՌԴ-ի, Ղազախստանի և Բելառուսի ներդրողների համար: Մենք, վերլուծելով Ղազախստանի և Բելառուսի փորձը, տեսնում ենք, որ միասնական տնտեսական տարածքի ստեղծումը լրջորեն մեծացրել է այդ երկրների ներդրումային ներուժը: Օրինակ, Ղազախստանի և Բելառուսի մեքենաշինության բնագավառներում իրականացվում են մեծածավալ ներդրումներ, իսկ մինչ այդ ոչ մի ներդրող լուրջ ծրագիր այդ երկրներում չէր դիտարկում: Վստահ եմ, որ նույնը կլինի նաև Հայաստանի դեպքում»,- ասաց Վալովայան:

Նրա խոսքով՝ այդ ներդրումներն առաջին հերթին կուղղվեն բարձր տեխնոլոգիական բնագավառներում, քանի որ դրանք Հայաստանում արդեն զարգացած են, որոնցով ՌԴ-ն հետաքրքրված է և շահագրգիռ: Վալովայան համոզմունք հայտնեց, որ երկու երեք տարի անց բոլորը կտեսնեն Հայաստանի ներդրումային գրավչությունը:

Միաժամանակ, ՀՀ էկոնոմիկայի փոխնախարար Կարինե Մինասյանը վստահեցրեց, որ ներդրումներ կլինեն նաև այլ՝ ավանդական ոլորտներում ու ճյուղերում: