Աշխարհում միանման կենսաթոշակային համակարգեր գոյություն չունեն. Արտեմ Ասատրյան

Աշխարհում միանման կենսաթոշակային համակարգեր գոյություն չունեն: Սահմանադրական դատարանում «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննության ժամանակ նշեց ՀՀ աշխատանքի և սոցիալական հարցերի նախարար Արտեմ Ասատրյանը՝ պատասխանելով ՍԴ նախագահ Գագիկ Հարությունյանի այն հարցին, թե ինչի՞ համար է շեշտադրվում կոնկրետ երեք երկրների՝ Շվեդիայի, Մակեդոնիայի և Էստոնիայի օրինակը և այդ երկրների փորձից ի՞նչն է, որ կարող է օգտակար լինել Հայաստանի համար: «Մեր աշխատողները կայքում տեղադրել են այդ երկրներ կատարած իրենց այցելությունների հաշվետվություններ: Օրինակ, նշեմ, որ մենք Մակեդոնիայում մեկ խնդիր ունեինք հասկանալու՝ անհատական հաշվառման համակարգի գործունեության սկզբունքները, որտեղ շատ հստակ առարկայական խնդիր կար հաշիվների վարման համակարգի հետ կապված»,-նշեց նախարարը:

Նա ընգդծեց, որ Մակեդոնիա կատարած աշխատանքային այցելությունը Հայաստանին թույլ տվեց ձևավորել սեփական համակարգը և փոխ չառնել Մակեդոնիայի փորձն այդ հարցում: «Ես կարծում եմ, որ մեր այս ամբողջ այցելությունները և ուսումնասիրությունները շատ օգտակար են եղել այս ընթացքում, իսկ մենք երբեք չենք ասել, որ Հայաստանում ներդրվող մոդելը կոնկրետ այս կամ այն երկրի մոդելն է»,- ասաց Ասատրյանը:

Անդրադառնալով պարտադիր կուտակային վճարի գանձման մեխանիզմներին՝ նախարարը նշեց, որ այն գանձվում է բազային եկամտից առանց եկամտային հարկը հանելու: Նրա խոսքով՝ սա ընդունված մոտեցումներից մեկն է, որ անձի ստացած գումարը սկզբից հարկվում է, սակայն հետագայում դրա ներդրումներից ստացած եկամուտները չեն հարկվում, չի հարկվում նաև վճարվող կենսաթոշակները: «Աշխարհում կան այլ մոդելներ ևս: Հարկվում է կենսաթոշակը, սակայն չի հարկվում ներդրումներից ստացած եկամուտը, կամ անձի սկզբնական եկամուտը»,- ասաց նա:

Անդրադառնալով Հայաստանի կողմից ընդունած մոդելին՝ նախարարը նշեց, որ քաղաքացիների տեսանկյունից շատ արդյունավետ է, երբ ի սկզբանե եկամուտը հարկվում է, հետագայում չի հարկվում կենսաթոշակը և ներդրումներից ստացած եկամուտը:

Անդրադառնալով կուտակային կենսաթոշակների սկզբունքին՝ նախարարը նշեց, որ դա համակարգին մասնակցությունը խթանելու համար է արված, որը ենթադրվում է, որ այն անձինք, ովքեր ցանկություն կհայտնեն մասնակցել կուտակային համակարգին, 5 տոկոսի չափով խթան կունենան կամավոր մասնակցել այդ համակարգին: