Արտեմ Ասատրյանը նպատակահարմար չի համարում կուտակային կենսաթոշակների օրենքի կիրառման ժամկետների հետաձգումը

Պարտադիր կուտակային կենսաթոշակների մասին օրենքի կիրառման ժամկետների հետաձգումը կարող է շատ ավելի ծանր իրավիճակի հանգեցնել: Սահմանադրական դատարանում «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննության ժամանակ այսպիսի կարծիք հայտնեց ՀՀ աշխատանքի և սոցիալական հարցերի նախարար Արտեմ Ասատրյանը՝ պատասխանելով ՍԴ դատավոր Ֆելիքս Թոխյանի հարցին, թե հնարավոր չէ՞ 1-2 տարով հետաձգել օրենքի կիրառումը՝ խնդիրները վերացնելու, հնարավոր թերությունները շտկելու համար: «Մենք արդեն որոշակիորեն ուշացել ենք օրենքի կիրառման ժամկետների հարցում, և ևս որոշ ժամանակով հետաձգելը կարող է ավելի ծանր իրավիճակի առաջ կանգնեցնել մեզ»,- նշեց նախարարը:

Անդրադառնալով հարցին, թե 5-10 տոկոսը շատ բարձր շեմ է կենսաթոշակային պարտադիր վճարների համար, ինչպես նաև առաջարկին, թե պարտադիր բաղադրիչը կարելի է կիրառել վերջին 15 տարիների ընթացքում, այլ ոչ թե 40 տարվա համար՝ նախարարն ընդգծեց, որ հաշվարկները ցույց են տվել, որ առնվազն 20-25 տարի պետք է եկամտի 10 տոկոսի չափով վճարումներ կատարվեն, որպեսզի հնարավոր լինի նախանշված փոխհատուցման գործակիցն ապահովել: «Եթե մենք սա չենք կարողանում ապահովել, ավելի լավ է չիրականացնենք այս բարեփոխումը, որովհետև այդ դեպքում հնարավոր կլինի անընդհատ քննադատել այս համակարգը, քանի որ այն չի կատարելու իր հիմնական գործառույթները»,- ասաց նախարարը:

ՀՀ Սահմանադրական դատարանն ընդմիջեց գործի դատաքննությունը: Այն կվերսկսվի ժամը 15:00-ին: Դատարանը կլսի կողմերի եզրափակիչ ելույթները և կգնա խորհրդակցական սենյակ' որոշում կայացնելու: Օրենքի մի քանի դրույթների սահմանադրականությունը վիճարկելու համար ՍԴ են դիմել 36պատգամավորներ: Դատաքննությունն սկսվել է մարտի 28-ին, շարունակվել այսօր: Դատարանըհասցրել է լսել դիմող կողմի ներկայացուցիչներին, պատասխանող կողմին' ԱԺ-ին, ԿԲ-ին և կառավարությանը: Դատավորները հարցեր են ուղղել կողմերին: ՍԴ նախագահը հայտարարեց, որ եզրափակիչ ելույթների համար կտրվի 30 րոպե: Հանրապետությունում հունվարի 1-ից գործարկվում է կենսաթոշակային պարտադիր կուտակայինհամակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափովպարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու է ֆոնդի կառավարիչների միջոցով: