Էրդողանի նպատակը ՏԻՄ ընտրությունների միջոցով կոռուպցիոն սկանդալից ազատվելն է. The Guardian

Համաշխարհային Մամուլ 31 Մարտ, 2014 16:24

Թուրքիայում մարտի 30-ին անցկացված տեղական ինքնակառավարման մարմինների ընտրություններին (ՏԻՄ) անդրադարձել է նաև միջազգային մամուլը:

Ինչպես հաղորդում է անգլիական Financial Times-ը գրում է, որ դեռևս պաշտոնական տվյալները չհրապարակված' ՏԻՄ ընտրություններում իր գլխավորած իշխող «Արդարություն և զարգացում» կուսակցության հաղթանակը տանելու մասին Թուրքիայի վարչապետ Ռեջեփ Թայիփ Էրդողանի կողմից արված հայտարարությունն այն տպավորությունն է թողնում, որ նա շտապում է միջոցներ ձեռնարկել իր հակառակորդների դեմ, ինչպես հայտարարել էր: «Բացի այդ, Էրդողանը դրանով ազդարարում է նաև նախագահական ընտրություններին իր պատրաստ լինելու մասին», -նշում է թերթը:

The Guardian-ը գրում է, որ մարտի 30-ի ՏԻՄ ընտրությունները դարձան «Էրդողանի ամբոխավարությունը չափող բարոմետր»: «Էրդողանի գլխավորած ԱԶԿ-ի հաղթանակից հետո կգա դաժան հարշվեհարդարների շրջանը», -հավելում է թերթը:

The Washington Post-ը նշում է, որ «Էրդողանը նպատակադրվել է ՏԻՄ ընտրությունների միջոցով ազատվել դեկտեմբերյան կոռուպցիոն սկանդալից»:

The Telegraph-ը զարմանք է հայտնում, որ, չնայած թուրքական կառավարության անդամների հետ կապված կոռուպցիոն սկանդալներին, ինտերնետի գրաքննությանը և զանգվածային բողոքներին, իշխող ԱԶԿ-ն առաջատար դուրս եկավ ՏԻՄ ընտրություններում:

Դեկտեմբերի կեսերին Թուրքիան ցնցած կոռուպցիոն սկանդալից հետո, որով բացահայտվել են թուրքական կառավարության անդամների, այդ թվում' վարչապետի, նրա որդու, փեսայի և դստեր խոշոր կոռուպցիոն գործարքները, Էրդողանը հայտարարել է, որ բացահայտումների հետևում կանգնած են Ֆեթուլլահ Գյուլենի կողմից ղեկավարվող արդի իսլամի գաղափարախոսակիր «գյուլենական համայնքի» հետևորդները, ովքեր ցանկանում են տապալել իր կառավարությունը:

Թուրքական ԶԼՄ-ների հրապարակած նախնական տվյալներով` ՏԻՄ ընտրություններում ԱԶԿ-ն ստացել է ընտրողների ընդհանուր քվեների 44 տոկոսը, գլխավոր ընդդիմադիր Ժողովրդահանրապետական կուսակցությունը' 26 տոկոսը, Ազգայնական շարժում կուսակցությունը' 18 տոկոսը, քրդական Խաղաղություն և ժողովրդավարություն կուսակցությունը' մոտ 5 տոկոսը:

Ըստ թուրքական մամուլի` ՏԻՄ ընտրություններում թուրքական իշխանությունները դիմել են նաև ընտրակեղծիքների: Որպես օրինակ նշվում է, որ Ստամբուլի Բաքըրքյոյ շրջանում բազմաբնակարան շենքի ընտրացուցակում դատարկ բնակարանում որպես ընտրող 40 մարդու ազգանուն է եղել նշված: Այդ խախտումը նկատած բնակիչները դիմել են ընտրական հանձնաժողով, բայց ոչ մի արդյունքի չեն հասել: