Հայաստանի պարենային շուկայում նկատվել է 1 տոկոս գնանկում

ՀՀ սպառողական շուկայում մարտին` փետրվարի համեմատ արձանագրվել է 0.4 տոկոս գնանկում: Պարենային ապրանքների (ներառյալ ոգելից խմիչք և ծխախոտ) գները նշված ժամանակահատվածում նվազել են 0.8 տոկոսով, ծառայությունների ոլորտում գրանցվել է սակագների' 0.3 տոկոս հավելաճ, իսկ ոչ պարենային ապրանքների շուկայում գների մակարդակը նախորդ ամսվա համեմատ մնացել է անփոփոխ: Ինչպես տեղեկացրել են ՀՀ ազգային վիճակագրական ծառայությունից, 2014թ. մարտին 2013թ. դեկտեմբերի համեմատ սպառողական գների ինդեքսը կազմել է 101.2 տոոկոս, այդ թվում, պարենային ապրանքներինը՝ 102.3 տոկոս, ոչ պարենային ապրանքներինը՝ 99.4 տոկոս, ծառայությունների սակագներինը՝ 100.1 տոկոս:

2014թ. հունվար-մարտին սպառողական գների միջին ամսական հավելաճը կազմել է 0.4 տոկոս, ինչը 0.6 տոկոսային կետով ցածր է նախորդ տարվա նույն ժամանակահատվածի համապատասխան ցուցանիշից։ 2014թ. մարտին 2013թ. մարտի համեմատ սպառողական գների ինդեքսը կազմել է 103.8 տոկոս, այդ թվում, պարենային ապրանքներինը' 101.7 տոկոս, ոչ պարենային ապրանքներինը' 102.4 տոկոս, ծառայությունների սակագներինը' 108.6 տոկոս, իսկ հունվար-մարտին 2013թ. հունվար-մարտի համեմատ' համապատասխանաբար 104.6 տոկոս, 103 տոկոս և 108.7 տոկոս:

2014թ. մարտին փետրվարի համեմատ հանրապետությունում արձանագրվել է պարենային ապրանքների 1 տոկոս գնանկում, ինչը հիմնականում պայմանավորվել է բանջարեղենի և կարտոֆիլի ապրանքախմբի, կենդանական և բուսական յուղերի, ձկնամթերքի' 6.2-1.0 տոկոս գնանկումով: Ոչ պարենային ապրանքների շուկայում գրանցված գների անփոփոխ ընդհանուր մակարդակի պայմաններում որոշ ապրանքատեսակների գներն աճել են, որոշ տեսակներինն էլ նվազել: Ծառայությունների ոլորտում 2014թ. մարտին փետրվարի համեմատ սակագների հավելաճը կազմել է 0.3 տոկոս: