ՆԱՏՕ - ն մտադիր է ընդլայնել համագործակցությունը Հայաստանի հետ. Spiegel

Արևմուտքի և Ռուսաստանի միջև ծագած սառը հարաբերությունները էապես մեծացրել են ՆԱՏՕ-ի նշանակությունը: Հյուսիսատլանտյան դաշինքն այժմ ձգտում է ընդլայնել իր ներկայությունը Արևելյան Եվրոպայում և մասնավորապես Հայաստանում, Ադրբեջանում և Մոլդովայում: Ինչպես հաղորդում է գերմանական Spiegel կայքը, անցած շաբաթ, այսպես կոչված, Գործընկերության կոմիտեն ընդունել է վերոնշյալ երեք երկրների հետ «հարաբերությունները խթանելու նպատակով գործնական միջոցներ ձեռնարկելու» մասին կատալոգ:

Այդ կերպ դաշինքը ձեռնարկել է տարածաշրջանի գործընկեր երկրներին աջակցելու նոր ուղիների հայտնաբերման աշխատանքներ: Ի թիվս այլ բաների, տարբեր ծրագրերի միջոցով երեք երկրները կխրախուսվեն ընդլայնելու ռազմական փոխգործակցությունը Դաշինքի հետ, ինչը ենթադրում է համատեղ զորավարժություններ և վերապատրաստումներ:

Երեք երկրները կմասնակցեն ՆԱՏՕ-ի «խելացի պաշտպանության» ծրագրերին, որի հաջող օրինակն է ՆԱՏՕ-ի երկրների համատեղ իրականացրած մոնիթորինգը Բալթյան օդային տարածքում: Հայաստանում առաջին պլանում են ուսումնական պարապմունքները բանակի հետ: Ադրբեջանի հետ կընդլայնվի համագործակցությունը կիբեռ և էներգետիկ պաշտպանության ոլորտներում:

Նշենք, որ մարտի 29-ին ՆԱՏՕ-ի կենտրոնակայանում տեղի է ունեցել «Քաղաքական և Գործընկերության կոմիտե+Հայաստան» ձևաչափով ամենամյա հանդիպումը:

Հանդիպման ընթացքում ՀՀ պաշտպանության նախարարի 1-ին տեղակալ Դավիթ Տոնոյանի գլխավորած պատվիրակությունը և Կոմիտեի' ՆԱՏՕ-ի անդամ և գործընկեր երկրների ներկայացուցիչները քննարկել են Հայաստանում պաշտպանական բարեփոխումները և պաշտպանական օրենսդրության ոլորտում վերջին նախաձեռնությունները: Մասնավորապես, անդրադարձ է եղել զինված ուժերի նոր կարգապահական կանոնագրքի ընդունման, պրոֆեսիոնալ կրտսեր ենթասպայական' սերժանտական կորպուսի ձևավորման օրենսդրական փաթեթի, նոր «Ռազմական կրթության հայեցակարգի» և խաղաղապահ ուժերի կարողությունների զարգացման գործընթացներում նկատված էական առաջընթացին:

Դաշինքը պատրաստակամություն է հայտնել այսուհետև ևս աջակցել պաշտպանության և անվտանգության ոլորտում իրականացվող բարեփոխումներին: