Էրդողանն Ալիևին նուրսիստների գաղտնի ցուցակ է տվել. թուրքական մամուլ

Թուրքիայի վարչապետ Ռեջեբ Թայիբ Էրդողանը երկրում անցկացված տեղական ինքնակառավարման մարմինների ընտրություններից անմիջապես հետո, որում հաղթանակել է նրա գլխավորած, իշխող «Արդարություն և զարգացում» կուսակցությունը, Բաքու կատարած մեկօրյա աշխատանքային այցի ժամանակ երկու երկրների միջև հարաբերություններին «վտանգ սպառնող»' իսլամի նուրսիստների աղանդի ադրբեջանցի հետևորդների գաղտնի ցուցակ է հանձնել Ադրբեջանի նախագահ Իլհամ Ալիևին: Այս մասին հայտնում է թուրքական իշխանամետ «Թաքվիմ» թերթը:

Էրդողանի ներկայացրած «դոսյեում» նշված են երկու երկրների միջև հայտնի նախագծերին ենթադրաբար խոչընդոտներ ստեղծող անձանց անունները և նրանց դեմ ձեռնարկվելիք հնարավոր քայլերը:

Քաղաքագետները Էրդողանի' առողջական խնդիրների հետ կապված բուժումը կիսատ թողնելով, մարտի 30-ի ՏԻՄ ընտրություններից անմիջապես հետո Բաքու կատարած այցի պատճառը կապում են Թուրքիայի և Ադրբեջանի «ռազմավարական ծրագրերի անհետաձգելի քննարկումների» հետ:

Ադրբեջանական ԶԼՄ-ները ևս հաստատել են, որ Էրդողանի շտապ Բաքու կատարած այցի գլխավոր նպատակը արդի իսլամի գաղափարախոս Ֆեթուլլահ Գյուլենի գլխավորած նուրսիստների «Հիզմեթ» շարժման ենթադրյալ անդամների ցուցակը Ալիևին հանձնել է եղել: Նշվում է, որ սեփական երկրում նուրսիստների գործունեությունից վախեցած թուրք վարչապետը Ալիևից պահանջել է շտապ կերպով «լուծել» ցուցակում նշված ադրբեջանցի նուրսիստների «հարցերը»:

Ուշագրավ է, որ Էրդողանի Բաքու կատարած այցի օրը, Թուրքիայի արտաքին գործերի նախարար Ահմեդ Դավութօղլուն աշխատանքից ազատել է ԱՄՆ-ում Թուրքիայի դեսպանատան մամուլի քարտուղար Մուստաֆա Սունգուրին, ով, ըստ թուրքական մամուլի' Ֆեթուլլահ Գյուլենի «գլխավոր մարդկանցից» մեկն է թուրքական ԱԳՆ-ում: Մուստաֆա Սունգուրը մեղավոր է համարվում թուրքական ԱԳՆ-ում եղած որոշակի փաստաթղթեր Գյուլենի ցանցին փոխանցելու մեջ:

«Ենի Մուսավաթ» թերթը հայտնել է, որ Թուրքիայի պաշտոնական շրջանակները Ադրբեջանի կառավարությանն են ներկայացրել նախագահ Իլհամ Ալիևի աշխատակազմում և ադրբեջանական կառավարությունում բարձրաստիճան անձանց ցուցակը, ովքեր մտնում կամ կապեր ունեն նուրսիստների կրոնական աղանդի հետ: Ֆեթուլլահ Գյուլենի աղանդի կողմից «հավաքագրված» չինովնիկների ցուցակում նշված են նաև Ադրբեջանի պետական նավթային ընկերության (SOCAR) նախագահ Ռովնագ Աբդուլաևի, փոխնախագահ Խալիգ Մամեդովի, կրոնական կառույցների հետ աշխատանքների գծով Պետկոմիտեի նախագահ Էլշիդ Իսքենդերովի, նրա տեղակալ Գյունդուզ Իսմայիլովի, Երիտասարդության և սպորտի նախարար Ազադ Ռահիմովի, փոխնախարար Ինթիգամ Բաբաևի, պատգամավորներ Գանիրա Փաշաևայի, Նիամի Ջաֆարովի, Ջեյհուն Օսմանլըի, AzTV-ի ղեկավար Արիֆ Ալըշանովի, Ադրբեջանի նախագահի աշխատակազմին կից Ռազմավարական հետազոտությունների կենտրոնի տնօրեն Ֆարհադ Մամեդովի, Երիտասարդական հիմնադրամի նախագահ Ֆարհադ Հաջիևի անունները: