Գյուլն ու Էրդողանը կպայքարեն նախագահի պաշտոնի համար. թուրքական ԶԼՄ-ներ

Թուրքիայի խորհրդարանի նախագահ Ջեմիլ Չիչեքը հայտարարել է, որ առաջիկա նախագահական ընտրություններում նախագահի պաշտոնի համար կպայքարեն երկրի գործող նախագահ Աբդուլլահ Գյուլն ու վարչապետ Ռեջեբ Թայիբ Էրդողանը: Այս մասին հաղորդում են թուրքական ԶԼՄ-ները:

Չիչեքը նշել է, որ Էրդողանի նախագահի թեկնածու առաջադրվելու մասին հայտարարությունից հետո Թուրքիայում դիմակայություններ տեղի կունենան:

Նրա խոսքով` Էրդողանի նախագահի թեկնածու առաջադրվելուց հետո երկրի իշխանության վերին օղակներում պայքարը կթեժանա: «Եթե Էրդողանը թեկնածու առաջադրվի, ապա մեծ լիազորություններով օժտված վարչապետի և հեղինակավոր, բայց պատասխանատվություն չկրող նախագահի միջև հարաբերությունները կվատանան: Աշխարհի ոչ մի վայրում նման համակարգ գոյություն չունի: Թուրքիայում ժողովրդի կողմից երկրորդ անգամ նախագահ կընտրվի, բայց նա կլինի լիազորություններ չունեցող և պատասխանատվություն չկրող նախագահ»,-ասել է Ջեմիլ Չիչեքը:

Թուրքիայում հերթական նախագահական ընտրությունները տեղի կունենան 2014 թ. օգոստոսին: 9 տարի երկրի վարչապետի պաշտոնը զբաղեցնող Էրդողանը բազմիցս հայտարարել է, որ ցանկանում է ընտրվել Թուրքիայի նախագահ: