Սիրիայում քիմիական հարձակման հետևում Թուրքիան է կանգնած. Սեյմուր Հերշ

Պուլիտցերյան մրցանակի դափնեկիր ամերիկացի լրագրող Սեյմուր Հերշը հայտարարել է, որ Սիրիայում իրագործված քիմիական հարձակման հետևում Թուրքիան է կանգնած:

Սիրիայում քիմիական հարձակման մեջ Թուրքիայի «մատը խառը լինելու» մասին պնդումը Հերշը կրկնել է LRB-ում (London Review of Books) հրապարակած «Կարմիր գիծ և գաղտնի գիծ» վերնագրով հոդվածում:

Հոդվածում Հերշը հայտարարել է, որ մեկ անգամ ևս պնդում է, որ անցյալ տարի օգոստոսի 21-ին Սիրիայում իրագործված քիմիական հարձակման հետևում կանգնած է թուրքական կառավարությունը: ԱՄՆ հետախուզության իրավասուների հայտարարությունների և հետախուզական տվյալների հիման վրա գրած հոդվածում ամերիկացի լրագրողը նշում է, որ Սիրիայում քիմիական հարձակումն իրագործվել է Թուրքիայի ազգային հետախուզական կազմակերպության և ժանդարմերիայի գիտությամբ' Ալ Քաիդային կից «Ալ Նուսրա ճակատ» խմբավորման կողմից: Նրա խոսքով, Թուրքիայի նպատակը քիմիական զենքի կիրառումը «կարմիր գիծ» սահմանած ԱՄՆ-ին Սիրիայում ռազմական գործողության դրդելն է:

Հոդվածում Հերշը հայտնել է, որ Լիբիայում գտնվող զենքերն ու սպառազինությունը Սիրիայի ջիհադական խմբավորումներին է փոխանցվել Թուրքիայի վրայով:

Սեյմուր Հերշը Բի- Բի- Սի-ին տված հարցազրույցում ասել է. «Կասկածներ չկան, որ քիմիական զենքերն օգտագործելու ձևերը «Ալ Նուսրա ճակատի» մարտիկներին Թուրքիայի տարածքում ուսուցանել են MIT-ն ու թուրքական ժանդարմերիան, ինչը խոսում է այն մասին, որ Սիրիայում այդ զենքը կիրառել են հենց այդ իսլամիստները, այնինչ, միջազգային ուժերը, չգիտես ինչու, կասկածում են միայն Բաշար Ասադին»: