Ուկրաինայի հայերի միության նախագահը հանդիպել է ՄԱԿ-ի փորձագետների հետ

ՄԱԿ-ի` Կիև ժամանած հատուկ զեկուցողները հանդիպում են ունեցել նաև Կիևում Ուկրաինայի հայերի միության նախագահ Վիլեն Շատվորյանի հետ: Ինչպես հաղորդում է Analitika-ն, հանդիպման մասնակիցները քննարկել են Ուկրաինայում մարդու իրավունքների, ազգային փոքրամասնությունների խնդիրները: Անդրադարձ է եղել նաև հայկական համայնքին:

«Ուկրաինայում հայերը հանդիսանում են Ուկրաինայի քաղաքացիներ, ովքեր ինտեգրված են երկրի հասարակական, պետական և սոցիալական ոլորտներում: Հայկական համայնքը միշտ էլ պաշտպանում է Ուկրաինայի շահերն ու իր ներդրումն է ունենում այն հարթակներում և ոլորտներում, որտեղ դա հնարավոր է իրականացնել»,-նշել է Շատվորյանը:

Ուկրաինայի հայերի միությունը միակ համաուկրաինական կազմակերպությունն է, որ միավորում է երկրում գործող բոլոր հայկական կառույցները: Ուկրաինայի հայերի միությունը Ուկրաինայի առաջին հասարակական կազմակերպություն է, որն ընդգրկվել է Եվրամիության ռեգիստրում' որպես ամենաթափանցիկ կազմակերպություն:

Ներկայումս Ուկրաինայում բնակվում է շուրջ 400 հազար հայ։ Նրանք ապրում են հիմնականում Կիևում (40 հազար), Օդեսայում, Խարկովում, Դոնեցկում, Լվովում, Զապորոժիեում, Ղրիմի քաղաքներում և այլուր։ Ուկրաինայում գործում են 23 հայկական եկեղեցի և 2 մատուռ, ամենօրյա և կիրակնօրյա դպրոցներ, հրատարակվում են «Արագած», «Մասսյաց աղավնի» հայկական թերթերը, «Սուրբ Խաչ» հանդեսը։ 2001թ. ստեղծվել է Ուկրաինայի հայերի միությունը: