Քեսաբահայության օգնության նպատակով հանգանակված ողջ գումարը փոխանցվել է Սիրիայում ՀՀ դեսպանատանը

Քեսաբահայության աջակցության նպատակով «Հայաստան» հիմնադրամի հաշվեհամարներին փոխանցված գումարն ապրիլի 9-ի դրությամբ կազմել է 63.069 ԱՄՆ դոլար, որն ամբողջությամբ փոխանցվել է Սիրիայում Հայաստանի Հանրապետության դեսպանատանը: Այս մասին տեղեկացրին «Հայաստան» համահայկական հիմնադրամի հասարակայնության հետ կապերի վարչությունից:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումը սկսվել է մարտի 21-ին Թուրքիայի սահմանային մի քանի կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում:

Տեղի Հայկական շտապօգնության մարմինը Սիրիայի Կարմիր մահիկի կազմակերպության հետ անհրաժեշտ պարագաներով և սնունդով ապահովել է բնակիչներին: Տեղեկություններ են հաղորդվել, որ նրանց ունեցվածքը թալանվել և Թուրքիա է տարվել: «Հայաստան» համահայկական հիմնադրամը կոչ է հղել հայրենաբնակ և սփյուռքահայ բոլոր անհատներին և կազմակերպություններին բարոյական և նյութական աջակցությամբ սատարել ծանր օրեր ապրող քեսաբահայությանը և բացել է հաշվեհամար: Նվիրատվությունները հնարավոր է ուղղել Արդշինինվեստբանկում բացված հետևյալ հաշվեհամարներին' 247010003090 (ՀՀ դրամ), 247010003090/0001 (ԱՄՆ դոլար), SWIFT: ASHBAM22: